Shillong, Risaw 22 : Ka kynhun ïalehkai jong ka Nongkseh Sport & Cultural Club ka la sdang ïa ka lympung ïakhun jong ka I-League 3 ha ka rukom kaba itynnad bha da ka jinglah jong ka ban pynliem haduh 4-1kol ïa ka kynhun ïalehkai jong ka Kuppuraj FC kaba long ha madan SSA Football Stadium ha kane ka janmiet sngi Palei. Da kane ka jingjop ka Nongkseh ka la ïoh ban khur suk ïa ki 3 point.
Ïa ka kol ba nyngkong jong ka kynhun la ïoh ban thep da u Owanijuh Pajuh tang ha ka minit kaba 38 jong ka kylla step ha shwa ba u kapten ka kynhun u Hardy Cliff Nongbri un khyrwit ïa ki ar kol tang ha ki san minit kata ha ka minit kaba 50 bad kaba 55 jong ka kylla miet. Ïa ka kol kaba saw pat la ïoh ban thep da u Ieitlang Syiemlieh ha ka minit kaba 58.
Na bynta ka Kuppuraj pat ïa ka shi kol la ïoh ban thep da u Jaymz Bryan Pale ha ka minit kaba 88 jong ka kylla miet.
Haba phai sha ka jingïakhun la sakhi ba ki shiteng kynta mar ïa sdang jong ka jingïalehkai la ïohi ba ka jingïakhun ka long mar ïa biang bor bha. Hynrei dei ha ka por ba ka Nongkseh ka ïoh ban thep shi kol ha minit kaba 38 ba ka rukom ïalehkai ka la kylla kynsan bad ka la pynlong ïa ka Nongkseh ban ïoh bor bad ban tehlakam ïa ka bol.
Kane ka la bteng wat ynda la poi ka kylla miet ha kaba ki rangïalehkai ka Nongkseh ki la ïoh ban tehlakam kham bun ïa ka bol hapdeng madan. Watla don ki khep ba ki rangïalehkai ka Kuppuraj ki ïoh ban pynsyier sha phyllaw kol hynrei ka rukom ïalehkai ka la kham noh sha ka Nongkseh.
Da katei ka rukom ïalehkai ka Nongkseh ka la ïoh ban pynjur shuh shuh ïa ka jingpashat bol sha khmat haduh ba kan da ïoh bïang ban thep sa lai tylli ki kol ha ka kylla miet ban pyntikna ba kan khur syndon ïa ki lai point ha ka jingïakhun sdang jong ka lympung.
Ka kynhun kan hap pat mynta ban kilan met bha na ka bynta ka jingïakhun kaba bud kaban long ha ka 24tarik mynta u bnai pyrshah ïa ka Chhaygaon FC ha ka por 5:00 baje janmiet.
