NONGSTOIñ, Risaw 23: Ki bor pynïaid District jong ka West Khasi Hills, ha ka jingïatreilang bad ka tnad jngohkai pyrthei, ka Haikai Travels, bad ka Mynni Mawbri Multipurpose Primary Agricultural Credit Cooperative Society Ltd., ka la pynlong ïa ka jingïakop pynher kotkudi (Kite Flying) bad ïakop shong kulai (Traditional Horse Riding) ha madan Mynni Mawbri hynne ka sngi Thohdieng.
Kine ki jingïakop la pynlong kum shi bynta jong ka jingrakhe jubili ksiar jong ka West Khasi Hills District kaba dang ïaid shakhmat.
Ka jingwan ïashim bynta ki nongshong shnong ka la nang pynphuh bad pynshongshit ïa kane ka jingrakhe dap 50 snem jong ka district. Kine ki jingïakob ki la pyni ïa ki riti dustur tynrai ba riewspah jong ka thaiñ katba ka pynshlur ruh ïa ki paidbah ban ïashim bynta ha kane ka jingrakhe Jubili Ksiar.
La wan sakhi lang ïa kane ka jingïakop da u Superintendent of Police ka West Khasi Hills District u bah H. Kharkongor; u bah R. Kharkongor-Block Development Officer (BDO), Mawshynrut; bah Marc A. N. Diengdoh, Tourist Officer, Nongstoin; u Rangbah Shnong ka Mynni Mawbri; bad ki dkhot jong ki nongshong shnong kiba don sawdong.
Kine ki jingïakop ki la wanrah ïa ka khyllipmat kaba sah jingkynmaw ïa ka jingrakhe Jubili Ksiar, da kaba pynïasoh lang ïa ka riti dustur, ka mynsiem ïalehkai, bad ka jingïashim bynta jong ki nongshong shnong. Ka pynpaw ruh ïa ka jingdonkam ban pynneh pynsah bad kyntiew ïa ka pateng tynrai jong ka District katba dang rakhe ïa ki san phew snem jong ka jingïaid lynti bad jingroi jong ka.
Ki nongjop ha ka Traditional Horse Racing ki long:
1st Place: Thup — rider Kynsaiborlang Wahlang.
2nd Place: Thup Rit — rider Wosligen Wahlang.
3rd Place: Nika — rider Eric Kharbani.
Ki nongjop ha ka Horse Show Competition ki long:
1st Place: Kulai Saw — presented by Sabut Wahlang.
2nd Place: Lai Lieh — presented by Pleindar Sangriang.
3rd Place: Koh Mut — presented by Beindinglan L. Marshillong.
Ki nongjop ha ka ïakop pynher kotkudi:
Highest-Flying Kite: Zachary Khongtim.
Most Creative Kite: Jubilathmu Mawlieh.
Biggest Kite That Flew: Khraw Mawlieh.
Kiba la khur Consolation Prize:
1. John F. Khyriem
2. Pynshaibor Marwein
3. Kailas Lyngdoh Nonglait
4. Longkmen Jat
5. John Marwein