Shillong, Risaw 23: Ka sienjam ba san (5th) jong ka lympung KIO North East Zone Karate Championship 2026 ka la sdang hynne ka sngi Thohdieng (23 tarik Risaw) ha NEHU Convocation Hall, da kaba wanrah lang palat 900 ngut ki nongïalehkai bad ki official na ka bynta kane ka lympung kaba ar sngi jong ka thaiñ ba la pynlong da ka All Meghalaya Karate-Do Association (AMKA) ryngkat ka jingkyrshan jong ka Directorate of Sports and Youth Affairs ka sorkar Meghalaya.
kane ka lympung ba la pynlong hapoh ka jingpeit jong ka Karate India Organization (KIO) ka dei ka sienjam kaba kyrpang ïa ka jylla Meghalaya, kaba la ïoh ïa ka lad ban pynlong biang ïa kum kane ka lympung Karate kaba heh hadien la jan dap 30 snem.
Kane ka lympung kan kut ha kane ka sngi Saitjaiñ, da ka jingïashim bynta ki nongïalehkai na baroh hynñiew tylli ki jylla jong ka thaiñ shatei lammihngi. Ka Meghalaya ka la sei madan da ka kynhun kaba khlaiñ kaba don 292 ngut ki nongïalehkai ba la kynthup lang shynrang bad kynthei, kiba ïakhun ban ïoh ïa ka namjop ryngkat bad ki nongïalehkai na kiwei pat ki jylla kiba ïashim bynta.
Ka jylla Meghalaya ka la jop katto katne ki takma ha ka por mynstep ha ka kata (demonstration) event. Hadien kane la pynbud sa da ka Kumite (sparring).
La wan kongsan ha ka sngi plie da u Myntri ka tnad Sports jong ka Sorkar jylla u bah Wailadmiki Shylla, uba la pynpaw ïa ka jingkyndit kaba kmen haba la pynkup burom ïa u da u President ka KIO u Bharat Sharma da ka khusnam black belt.
Haba ai jingkren ha ka jingïalang, u bah Wailadmiki Shylla u la ïaroh ïa ka jingkyrshan kaba nangkiew jong u Myntri Rangbah ka Jylla u Conrad K Sangma ha ki jingtei jaka ïalehkai bad ka jingpynroi ïa ki nongïalehkai ha ka jylla. U la ïaroh ruh ïa ka AMKA halor ka jingtrei shitom bad ka jingaiti lut jong ki dkhot jong ka, ym tang ha kane ka lympung hynrei baroh shisnem.
“Ha ka por ba nga la long u Myntri ka tnad Sports, Nga la ïohi ba ka AMKA ka dei kawei na ki synjuk ïalehkai kaba trei shitom bha ha Meghalaya,” u la ong. “Nga kyrmen ban dang ïohi shuh shuh ïa kum kine ki lympung ban pynlong ha ki por ban wan ban ai ka rynsan ïa ki nongïalehkai karate jong ngi ban nangroi bad pynpaw pyrthei ïa ki sap jong ki.”
U Myntri u la ai khublei ruh ïa u Sharma na ka bynta ka khusnam black belt. “Ngam shym la khmih lynti ïa kum kane ka jingleh. Nga sngewthuh ïa ka burom kaba phi la ai ha nga bad ngan pyrshang ba ngan ai ka jingkyrshan kaba pura ïa ka synjuk karate jong ngi bad ban thaw ki lad ïa ki nongïalehkai karate jong ngi.”
Shuwa ba un kren, u President ka AMKA u bah Hunlang Lytan u la pdiang sngewbha ïa ki riew rangbah bad ïa baroh ki nongïalehkai ha kane ka lympung.
U bah Hunlang ula pynpaw ka jingsngewnguh ïa ka sorkar jylla kaba la kyrshan ïa ka karate bad kiwei pat ki jait jingïalehkai ha Meghalaya da ki jingtei kiba kham bha, bad ruh ki scholarship bad ki khusnam pisa ïa ki nongïalehkai ba ïoh khur takma.
Nangta u Sharma u la bynrap ïa ka jingai khublei jong u ïa ka AMKA, da kaba ong ba u “kmen haduh katta katta” ïa baroh ki jingpynbeit ba la pynbit pynbiang na ka bynta kane ka championship.
Kum shi bynta jong ka jingïalang plie ïa kane ka lympung, ka la don ruh ka jingpynkup burom ïa ki nongïalehkai karate jong ka thaiñ Shatei Lammihngi kiba la mihkhmat ïa ka ri India ha ki lympung ïalehkai bar ri ba dang shen da u Myntri ka tnad Sports-bah Wailadmiki bad u Sharma. Kine ki kynthup ïa u nongïalehkai Karate ka Meghalaya u Gideon Tympuin bad u Daniel Dabiangbha Warjri, kiba la khur takma ha ka lympung ïakop jong ka South Asian Karate Championship 2026.
Kane ka lympung ka kit ïa ka jingmut kaba kham khraw namar ki nongjop kin ïoh rung sha ka KIO Inter-Zonal Karate Championship 2026, kaba la buh ban pynlong ha New Delhi kham hadien mynta u snem.
Nalor kiiwei pat ki riew pawkhmat kiba la don lang ha kane ka sngi ki long u Working President ka Meghalaya State Olympic Association u bah John F Kharshiing, u General Secretary ka MSOA u bah Finely L Pariat, u Treasurer ka KIO u Mutum Bankim Singh bad u Chairman of the Referees Commission ka KIO u Premjit Sen.
