Hadien 64 sngi tam ba shong ha along lait jamin noh ki dkhot ka KSU, shen yn shong jingïalang
Ka along kadei ka skulbah naka bynta ki dkhot ka KSU
Shillong, Risaw 23: Ki Arngut ki nongialam ba hakhmat eh jong ka Khasi Student Union (KSU) u President u Samla Raymond Kharjana bad u General Secretary u samla Reuben Naijar ha ka janmiet sngi Thohdieng, kila ioh jamin bad kila mih noh na District Jail Shillong.
Kane kadei hadien palat 64 sngi tam ba ki nongialam ka KSU kila shah kem ha ka miet jongka 19 tarik u Nailar namar ka jingmih ka huri hura na ka rally arshaka kaba la pynlong da ka KSU ha katei ka sngi hi.
Ïa ki 2 ngut ki nongialam ba ioh jamin la wan shaw da ki dkhot ka KSU na District Jail.
Haba kren sha ki lad pathai khubor u President ka KSU u samla Raymond Kharjana ula ong,”wat hapdeng ka jingdon ha phatok ki nongïalam kim shym la duh jingkyrmen namar ki tip bha ba ki dkhot ka seng kin ïai ïakhun ban pynurlong ïaki mat jingdawa kaba ka seng kala buh hakhmat ka Sorkar”.
“Ka along kadei ka skulbah naka bynta ki dkhot ka union ban pynkhlain ïa ka bor jingialeh naka bynta ka bha ka miat jong ka jaidbynriew bad ka jingshong along jong ki nongialam kadei ka jingkyrkhu namar ki mat jingdawa kila sdang wandur ban urlong” la ong u samla Kharjana.
Shuh shuh u la ong ba ka CEC ha ki sngi ban wan kan sa shong jingialang ban pyrkhat ia ki sienjam ban shim nangne shakhmat khnang ba ka Sorkar kan pynurlong lut ia ki mat jingdawa.
“Haba ngi don haka seng ngi hap ban pyrkhat lypa ba kawei ka kjat ka don ha along bad kawei ka don habar bad ka jingshong along kam lah ban pynduh mynsiem iaka jingialeh naka bynta ka bha ka miat jong ka jaidbynriew” la ong u samla Raymond.
U President ka KSU ula kynnoh ruh ba kala don ka jingpyrshang ban pynthohbria ïa ki nongialam hynrei kine ki jingpynthohbria kim lah ban pynduh ïa ka mynsiem jingialeh jong ki nongialam ne ki dkhot jong ka seng.
Haba kylli halor ki kyndon pyllait jamin, u President ka KSU ula ong “Ban kren ia ka jingshisha por ba ki kam nga khlem peit ia ka ejahar pyrshah ia ngi bad por ki pyllait ruh nga khlem peit ia ki kyndon hynrei ngi shaniah ha ka kynhun Legal Team jong ka KSU ban leh ia kaba donkam”.