Nongpoh, Ïaiong 19 : Ka Umsning Town Dorbar da ka jingsngewsarong mynta ka sngi kala pynkup burom kyrpang ïa u Dr. C Lyngdoh halor ka jingjop donburom jong u ha kane ka elekshon MLA ba dang shu dep ba ki paidbah kila ibit biang ba un long kum u nongmihkhmat ka Umsning Constituency.
Ïa katei ka jingpynkup burom la pynlong ha Umsning Auditorium, bala sakhi ruh da ka jingdonlang u Bah Rocky Kylla Chairman ka Umsning Town Dorbar bad ka kynhun, ki nongïalam jong ka seng longkmie, ki samla lem bad ki khynnah skul jong ki skul bapher bapher ka thaiñ Umsning.
Naka liang ka Umsning Town Dorbar kala pynkup burom ruh da ki jaiñ ryndia bad momento kum ka dak ka jingsah jingkynmaw bad naka liang ki longkmie bad ki samla ruh kila pynkup burom lang ha katei ka sngi bad la ioh ruh ban ot ïa u cake kum ka dak ka jinglehkmen ha katei ka sngi.
U Bah Rocky Kylla kum u Chairman ka UTD haba kren ha katei ka sngi u la ong ba ka ju long ka rukom ba ka ophis jong ka UTD ka ju pynkup burom ïaki nongmihkhmat kiba jop na Umsning la ki dei na kano kano ka party, kum ka dak ka jingsngewsarong ban bteng ka jingïatreilang naka bynta ki kam pynroi ba dei haka jingïalang jong ki nongïalam la rai ban pynkup burom syndon ïa u Dr. C Lyngdoh u ba dei ruh u wei naki nongmihkhmat ba paw ha kane ka dorbar kaba dang shu dep.
U Dr. C Lyngdoh haba kren ha katei ka sngi u la ai ka jingkhublei ba kyrpang halor ka burom kaba kila pynkup ïa u hadien ba ki paidbah kila ibit ban long kum u nongmihkhmat na katei ka thaiñ, bad ka dei ka kamram jong u ban trei naka bynta ki paidbah ha kine ki 5 snem, bad kyrpad ruh naduh ki nongïalam shnong ban ai ka jingïatreilang wat kito ki bym shym la kyrshan ha kane ka elekshon bala dep.
U la ong ruh ba ka long kaba eh ïa u nongmihkhmat ban pyndep lut ïaki jingdonkam tang hapoh ki 5 snem hynrei ki paidbah kiba jied ki dei ban long kiba stad ban ailad ïa uno uno u nongmihkhmat ban bteng ïaka jingshakri ban suk ban buddien ïaki kam.
