Ar tylli ki shnat pynmih bor ding ha EJHD hynrei dang bun ki jaka kiba dang kyrduh bor ding :Damewanhi Rymbai

Khliehriat kyllalyngkot 19 : U bah Damewanhi Rymbai, uba dei ruh uwei na ki kyrtong jong ka Voice of the People (VPP), uba ïa la ïakhun ha kane ka MLA elction kaba dang shu dep, u la pynpaw ka jingsngew khia halor ka jingkyrduh bor ding hapoh ka jylla, u la kren ruh halor ka jingkyrduh bor ding ha East Jaiñtia Hills District bad ong ruh ba ka long shisha bad kaba sngew lyngngoh ba hapoh ka district ki don ar tylli ki shlem pynmih bor ding, ka Myntdu Leshka Project-Stage 1, kaba don ha shnong Suchen bad ka Power Grid Station kaba don ha Deiñshynrum, hynrei ka rukom ïoh bor ding ki paidbah pat ka dang duna shibun.
Haba kren halor katei ka phang, u bah Dame, u la ïathuh ba kane ka jingduna ka bor ding (low voltage) ka jia bha khamtam ha shnong Wapung ha kaba tang shu poi ka por jan miet, ka bor ding ka la duna (low voltage), ki briew ki kim lah shuh ban pyndep ïa kino kino ki kam kiba dei ban trei da ka bor ding electrict, kum kaba shet ja, kaba pyndonkam ïa ki refrigerator, kumjuh ruh ki briew kim lah ban treikam da ki computer ha ka por janmiet ne mynmiet bad kiwei kiwei ki kam kiba da ka bor ding electrict namar ka jingduna palat ka bor ding (low voltage).
Haba kren ha kawei na ki rynsan, u bah Dame u la kynthoh jur ruh ïa ka jingleh ka tnat bor ding, ha kaba ki don ki longiïng kiba ïoh bor ding lyngba ka BPL, ka bor ding na ka bynta kiba duk kaba ki hap ban siew ha ka dor kaba rit, hynrei ka tnat ka pynpoi bill ne bai bor ding sha ki long iïng haduh hadien 7-8 snem, kumta don ki longiïng kiba kynduh jingeh ban siew ïa ka bai bor ding bad haba kim lah ban siew ka tnat ka wan ot noh ïa ka bor ding.
Kaba sngewlyngngoh ruh ban ïohsngew ba ka shnong Suchen kaba dei ka shnong kaba don ka Myntdu Leshka Project ka dang ïoh bor ding dang myn ha u snem ba la leit “ Ha ka jingshisha ngim dei shuh ban kyrduh bor ding bad ngi la dei ruh ban ioh ei ïa ka bor ding, hynrei la ïohi ba ki pynbiang bor ding bha pynban sha ki company ba shong ki dkhar kiba shu wan kamai spah, katba ïa ngi pat kiba don hok ban ïoh, kiba dei ki nong shong shnong ba pura jong ka disttrict, kiba dei ruh ki nongjied ïa ki nongmihhmat, kiba hap ban ïa peit ïa ka eh ka shon ngim ju sngew ba kin ïakren ei ei ha kaba ïadei bad kine ki ar tylli ki project, kumjuh ruh kum kum ha ka thungkam thungjam ïa ki briew ka thaiñ ka ban pynioh jingmyntoi ki paidbah”
U la ïathuh ruh ba ka sorkar mynta ka dang pynkhreh shuh shuh ban shna ïa ka DPR ka ban shna ïa Myntdu-Leshkha Stage-2 ha shnong Bataw, ïa kane ka project ki paidbah kim tip satia, u la kynthoh ba kane ruh ka dei ka jingthmu kaba dei ka jingleh sop sop ka sorkar tang ban ïoh ban kamai spah na kane.
Kum uwei na ki riew rangbah jong ka East Jaiñtia Hills District, uba la pyrshah ruh ban bsut khlieh sha ka sain hima Sima, u don ka jingsngew khia bad u da angnus ruh ban ïoh ka lad ban weng noh ïa kane ka jingshem jingeh ha ryngkat ka jingïatreilang bad ki paidbah.