Pynkup burom ka NPP Nongpoh ïaki longkmie kiba la nohsynñiang bun ki kam haka imlang ka sahlang

Nongpoh, Jymmang 10: Ka National People’s Party, Nongpoh Block mynta ka sngi kala rakhe ïaka sngi jong ki longkmie ne ka Mother’s Day ban pyndon burom ïa ki longkmie kiba long kum ki nongri nongsumar ban tei ïaka longiing longsem bad kumjuh ka imlang ka sahlang.
Ïa katei ka jingrakhe la pynlong ha Parish Hall ha Nongpoh ha kaba u Bah Charles Marngar MLA ka Mawhati u la wan ban shim bynta kum u kongsan haka jingdonlang ka kong Rona Khymdeit MDC ka Nongpoh, ka Dr. Jasmine Lyngdoh President ka NPP Women’s Wing haka jylla, u Bah Clement Mawlong President ka NPP Ri-Bhoi District, u Bah Pyndaplang Wahlang President ka NPYF, Ri-Bhoi District, u Bah Henry Nongrum President ka NPP Nongpoh Block bad kiwei kiwei ki nongïalam ka party, ki riew rangbah lem bad ki spah ngut ki longkmie na kylleng ki shnong ba hap ha Nongpoh Block.
Ha katei ka sngi naka liang ka NPP Nongpoh Block kala pynkup burom ruh ïa ka kong Rona Khymdeit kum ka MDC ba thymmai kaba dang shu jop shen na Nongpoh Constituency, bad kumba 100 ngut kiwei pat ki longkmie kiba don bynta ban noh synñiang haki kam bapher bapher haka imlang ka sahlang.
Haba kren ha katei ka sngi ka kong Rona Khymdeit kum ka MDC kaba dang shu jop shen na Nongpoh kala pynpaw ka jingsngewkmen kaba khraw hadien ba kum ka party kala kynmaw burom ban rakhe pyndonburom ïa ka sngi ki longkmie bad khamtam ban pyndon burom ruh ïaka kum ka MDC ba thymmai ryngkat shibun kiwei pat ki para longkmie kiba la don bynta haki kam bapher bapher ban shakri haka imlang ka sahlang ryngkat ka jingkyntu ba nangne shakhmat ka jingtrei kam nang rhem ban nang pynjanai shuh shuh ïaki kam ki jam khamtam ka bha ka miat haka imlang ka sahlang.
U Bah Charles Marngar kum u kongsan haba kren ha kane ka sngi u la ong ba ki longkmie ki dei shisha ki jingthaw kiba u Blei u la thaw kyrpang ban long ka jingtngen ïaka iing ka sem, ka imlang ka sahlang namar ki long ki nongri nongsumar, namar ka iing ka sem hi kaba khlem ka kmie ka long ka iing ka sem kaba thylli.
U la ong ruh ha kiba bun ki khep ki longkmie ki dei ki nongwanrah ka jingbha haka imlang ka sahlang bad kyntu ruh ïaki ba kin long ki atiar ban ïakhun pyrshah ïa u drok ha kane ka juk ba mynta bad bun ki kam sniew namar ym don satia ka longkmie kaba kwah ba ki khun kin jot ki pra, hynrei ban ioh ïaka iing ka sem bad ka imlang ka sahlang kaba suk ba saiñ bad lait naki kam sniew.