Ha sngi pynskhem nongkitkam, kynmaw burom ka FKJGP ïa u (L) Sounder Strong Cajee
Mawkyrwat, Jymmang 10: Ka Federation of Khasi Jaiñtia & Garo People (FKJGP) jong ka Malai Sohmat Unit ka la ïoh ka jingpynskhem ïa ki Nongkitkam bad Dkhot ba thymmai jong ka Malai Sohmat Unit bad ym tang kata kum ka dak jong ka jingkynmaw burom ïa uwei na ki nongseng ïa ka FKJGP, u (Late) Sounder Strong Cajee ka la pynlong ka jingsngap jar ba shi minit.
Ïa ka jingïalang ha kane ka sngi la pynïaid da u Founder President jong ka Malai Sohmat Unit, la ïoh ka jingkren pdiang na u Secretary ka Malai Sohmat Unit, kumjuh la ïoh jingkren bad jingaimynsiem na u Rangbah Shnong Kenbah Malai, u Bah Wandington Dewkhaid, na u Secretary Hima Malai Sohmat, u Bah Lumbor Suram bad na u Acting Chief Hima Malai Sohmat Syiemship, u Bah B. Dewsaw.
La ïoh ruh ban pule ïa ki kyntien bam smai bad pynskhem ïa ki nongkitkam bad dkhot bathymmai ka jong ka seng da u President ka FKJGP South East Khasi Border Circle, u bah Kyrmen Shangdiar haba ki nongkitkam jong ka KJGP Malai Sohmat Unit jong u snem 2025-28 ki long President u Levenson Shangdiar, Vice president u Tyngshain Ronsang, General secretary u Dansing Shangdiar, Asst secretary u Morningstar Iawrod, Organising Secretary u Dansing Iawrod, Education Secretary u Bakstar Syiemlieh, Sport Secretary u Shambor Sohtun bad kynthup ïa ki 10 ki dkhot ka executive.
Ha kaba kren ha kane ka sngi, u bah Kyrmen Shangdiar, President ka FKJGP South East Khasi Border Circle, u la ong ba kum ki nongkitkam bad ki dkhot ba thymmai ki dei ban mat ïa ki jingtyrha bad ki jingeh ba bun jait, hynrei ki dei pat ban kynmaw ba ki dei ban don ïa kine ki jinglong ba hakhmat eh ban leh ka long ba kin don ïa ka jinglong jong ka jingsngewkitkhlieh ïa ka kam, ka jingñiewburom iwei ïa iwei pat, ka jingïaishah bad ban long kum ki briew ba don ki khmat kum ki bym ïohi bad kiba don ki shkor ki bym ïohsngew kaba mut ban kim dei ban sngap ïa ki jingkynthoh kynnoh hynrei ban ïaid beit shakhmat shaphrang.
Ym tang kata, la ïoh ban kren aikhublei na u President bathymmai jong ka Federation of Khasi Jaiñtia & Garo People (FKJGP) jong ka Malai Sohmat Unit, u bah Levenson Shangdiar bad la pynwai ïa ka jingïalang da ka jingduwai pynskhem ïa ki jingpyndep kam da u Secretary ka Hima Malai Sohmat, u bah Lumbor Suram.