Um tip ei ei ïa ki kam pynroi kiba u MLA/MDC ula pynïoh sha ka dong ka thaiñ

Mawkyrwat, Nailur 29: Halor ka jingkynthoh jong u bah Pynshailang Lyngdoh ha ki lad pathai khubor ha kine ki khyndiat sngi pyrshah ïa u MLA/MDC jong ka Ranikor Constituency da kaba ula ong ba u MLA/MDC naduh ba ula jop haduh mynta u khlem leh ei ei ïa ka dong ka thaiñ khamtam hapoh ka area jong ka Phlangdiloiñ hynrei u shu shongkli-kti.
Namarkata, halor kane ka jingshah kynnoh na ka liang ki ‘riew rangbah jong ka dong ka thaiñ Phlangdiloiñ ki la mih shakhmat ban pynshai ïa ki kam pynroi kiba u MLA/MDC bah Pius Marweiñ ula noh sha kane ka dong ka thaiñ Phlangdiloiñ.
Ha kajuh ka por ki la pynrem jur ïa u bah Pynshailang Lyngdoh da kaba ong ba une u rangbah um tip ei ei ïa kine ki kam pynroi kiba u MLA/MDC ula noh sha kane ka dong ka thaiñ namar ïa lade u sah ha Shillong ki la ong ruh ba ka jingkynnoh jong u bah Pynshailang Lyngdoh ka dei tang ki buit ban pynthohbria ïa u nongmihkhmat jong ka Ranikor Constituency, katba u nongmihkhmat haduh mynta u khlem shongkli-kti kumba la kynnoh da u bah Pynshailang Lyngdoh hynrei u pyrshang na ka por sha ka por ban pynurlong ïa ki jingthrang jong ki paidbah ka dong ka thaiñ Phlangdiloiñ.
“Mynta ka dang don ka jingpynkhreh ban shna bad siang rong ïa ka surok hapdeng shnong ka shnong Phlangdiloiñ kaba don 1 kilometre tam na ka bynta ka jingpynkhreh ïa ka jingïaseng ïa syllok ki pastor jong ka KJP Synod Sepngi, bad kitei ki riew rangbah jong katei ka dong ka thaiñ Phlangdiloiñ ki don ka kyrmen kaba skhem ba ha ka jingïalam jong u Bah Pius Marweiñ kum u nongmihkhmat jong ka dong ka thaiñ kin sa ïoh ïa ka surok na Wahkaji – Phlangdiloiñ shaduh Langpa ban siang rong noh kumba ki la thrang la slem slem bah.