Nongpoh, Nailur 29: Ka skul Pahamrioh Government LP School kawei naki skul kaba la rim bad jot rathai, kala ioh ïaka mang tyngka kaba haduh T.70,18000/- lyngba ka Mission Education, ban tei thymmai ïaka building jong ka skul naka bynta ka jingbit jingbiang jong ki khynnah khamtam ban lait na u slap bad ka lyer kaba lah ban buh jingma ïa katei ka skul ha kano kano ka por.
Ïa kane ka skul la wan ban buh mawnongrim mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Dr. Abhishek Saini Deputy Commissioner ka Ri-Bhoi, u Bah R Shadap DSEO ka Ri-Bhoi, u PP Yadav SDSEO, u Bah NN Ryndong Rangbah Shnong ba dei ruh u Chairman ka SMC jong katei ka skul, ki nonghikai, ki kmie ki kpa lem bad ki khynnah skul bad ki samla katei ka shnong lem bad kiwei kiwei ki riew rangbah.
Ha katei ka juh ka sngi naka liang u MLA u la aiti ruh ïaka Work Order kaba T.6 Lakh ban shna bad pynbha ïaka iing Dorbar bad kumjuh ruh 30 hajar ban pynbha ïaka lynti kjat ha katei ka shnong ryngkat ki khiew, ki shuki bad kiwei kiwei ki tiar donkam jong katei ka shnong.
Haba kren ha kane ka sngi naka liang u Bah Mayral Born Syiem MLA ka Nongpoh u la ong ba ka sorkar jylla lyngba ka Mission Education jong ka tnad pule puthi ka don ka thong ban pynbha ïaki skul kiba la jot kiba la pra haka jylla baroh kawei bad kane ka long kawei naki sienjam ban pynurlong ïaka jingangnud jong ki paidbah ban pynbha ruh ïa kane ka skul kaba don ha ka shnong Pahamrioh.
“Ka pule puthi ka long kaba kongsan haduh katta katta, bad kiba bun ki longing ha kane ka shnong kidei kiba duk bad kiba duna ka jingioh bad ki shem jingeh ban phah skul ïaki khun sha jngai bad ka long kaba donkam ban don ka skul ha kane ka shnong naka bynta ban phrang jingnang jingstad ïaki khynnah bad kane ka long ka jingkyrkhu ïaki khynnah ha katei ka shnong hadien ba ka sorkar kala shimti ïa katei ka skul naduh u snem 1994” la ong u Bah Mayral da kaba bynrap ruh ha ka jingïaid lynti kane ka skul kala mad jingeh haba ïadei bad ka skul building bad kumta kum u MLA u la shimkhia ban buh ka jingkyrpad sha ka sorkar ba kan shimkhia ban pynmang pisa, bad hapdeng ka jingïakhun kane ka skul ka long kaba donbok ban ioh pdiang ïa katei ka mang tyngka.
