Da ka Sierlapang Operation byrthen ka HYC ban khynra ïa ki mynder ba rung be-aiñ sha Meghalaya

Shillong, Jymmang 10 : Ka Hynñiewtrep Youth Council (HYC) ha ka sngi Saitjaiñ ka la shim ïa ka rai ban sdang ïa ka “Sierlapalang operation” pyrshah ïa ki briew kiba wan rung be-aiñ sha ka jylla Meghalaya.
Haba kren sha ki lad pathai khubor hadien ba la wai ka jingïalang jong ka CEC, u president ka HYC u bah Roykupar Synrem u la ong, “Ngi la rai ban sdang noh ïa ka Sierlapang Operation pyrshah ïa ka jingwan buhai shnong beain na ka bynta kito ki briew kiba wad kam wad jam ha kane ka jylla.”
U ong ruh ba kane ka jingkhynra ka long ban wad ïa ki nongwan buhai shnong beain kiba sah ha Meghalaya khlem ki kot ki sla kiba biang bad ka jingïoh pynrung kyrteng. “Ka jylla Meghalaya ka la dep thaw ïa ka ain Meghalaya Identification, Registration, Safety and Security of Mighalaya Workers Act, 2020.
Katkum kane ka ain, uwei pa uwei u nongbylla uba wan na shabar u dei ban shah pynrung kyrteng ha kane ka Act. Ngi kwah ban pyntikna ba baroh ki nongbylla ba wan na shabar ki dei ban rejistar bad lada lap ba kim rejistar bad kim bud ïa ki kyndon, ki dkhot jongngi kin shim ïa ki sienjam katkum ki kyndon jong ka ain,” u la ong.
U la ong ba ym lah ban kyntait ïa ka jingshisha ba da ka jinglong jingman kaba don hapdeng ka India bad ka Pakistan, ki la don ki khubor shaphang ka jingwan buhai shnong beain kaba jia ha ka jylla.
Katkum ka khubor na ki heh BSF, la kdew ba la ioh ban bat bun bha ki nongwan rung tuh sha ka jylla lyngba ka khappud.
“Wat ki dkhot jongngi na ki jaka khappud bad ka Bangladesh ki ju ïoh bat bun bha ki nongwan rung tuh na khappud bad ki ju aiti noh ïa ki sha ki pulit. Lada ym lah ban peit bniah ïa ki jingwan rung tuh beaiñ na Bangladesh, ka jingshngaiñ jong ka jylla jongngi kan shah ktah bad kumjuh ruh ka ri baroh kawei,” bynrap biang u President.
La ïathuh ba dei halor kane kamat ba ka seng ka la bthah ïa baroh ki unit bad ki dkhot ha ki jaka ba don ha khappud bad ka Bangladesh ba kin long kiba husiar bha bad lada ki lap ïa ki briew kiba artatien, dei ban kem ïa ki bad aiti sha ki pulit na ka bynta ban pynshisha bad leh ïa kaba donkam. “Ngi kyntu ïa ka tnad pulit ban ailad nyngkong eh ban pynshisha ïa kum kine ki briew kiba don jingartatien hadien ba la ïoh bat na ki khappud,” u la ong.
Haba pynpaw ba ka jingwan buhai shnong be-aiñ kam ju jia tang na khappud bad ka Bangladesh, u Bah Roykupar u la ong ba katkum ka khubor ba la ïoh lum, ki don ki briew kiba shah kem ha Delhi, Chennai bad kiwei kiwei ki jylla ba kawei na ki lynti ba kine ki briew ki ïaid ka dei ka Meghalaya.
“Ki la don ki khubor namar ki jingshah kem kiba dang jia ha kiwei ki jylla kum ha Gujarat, Delhi, kine ki briew ki wad ki lad ki lynti ban wan leit phai biang sha Bangladesh. Don napdeng jong ki kiba la shah kem ha Meghalaya. Da ka jinglong jingman mynta ha shilynter ka khappud bad ka ri Bangladesh, ki BSF ki dang pahara bha kumta kine ki briew kin ym leit phai biang sha Bangladesh hynrei kin wad lad ban ïoh kam bad ka jaka ban rieh ha Meghalaya. Kumta, shen ngin sa sdang ïa ka jing jingkhynra ban pynthikna ba yn ym ailad ïa kino kino ki nongwan buhai shnong mynder ba kin shong kin sah ha Meghalaya,” u la bynrap.