Pynkup burom ka KSU Mawkyrwat Circle ïa ki ar ngut ki ‘rangïalehkai kynjatbol kiba la mihkhmat ha ka 76th HST 2023

Mawkyrwat, Ïaïong 03: Ka Khasi Students Union (KSU) jong ka Mawkyrwat Circle mynta ka sngi ka la ïoh ban pynkup burom ïa ki ar ngut ki ‘rangïalehkai kiba la mihkhmat ïa ka kynhun jong ka Meghalaya Football Team bad kaba la poi ha ka kyrdan kaba ar ha ka 76 Hero Santosh Trophy 2023 ba la pynlong ha Riyadh, Saudi Arabia ha kine ki khyndiat sngi. Ki ar ngut kiba la shah pynkup burom ki long u Manbhakupar Iawphniaw na ka Shnong Mawkyrwat bad u Wanboklang Lyngkhoi na ka Shnong Marshilong ki shnong kiba hap hapoh ka South West Khasi Hills District.
U bah Pauldeep Tongwah, President bad u bah Rutherford Lyngdoh, General Secretary jong ka KSU Mawkyrwat Circle haba kren ha ka jingïalang ki la pynpaw ka jingaikhublei kaba kyrpang na ka bynta ki ar ngut ki samla jong ka dong ka thaiñ kiba la long da shisha ka nuksa ba bha na ka bynta kiwei de ki khun samla ha kaba ki la ïoh ban mihkhmat ïa ka jylla ha ka kam ïalehkai kynjatbol. “Ngi sngewsarong ba phi la lah ban long ka nuksa ïa kiwei dei lyngba ka jingnoh synñiang jong phi ha ka ri bad ka jaidbynriew da kane ka kam ïalehkai kynjatbol”, ki la ong.
Ha kajuh ka por ki la ai mynsiem ïa ki ba ha ka jingïaid lynti jong ki ka dang long ka lynti kaba jngai bha bad kyrmen ba nangne shakhmat kin sa lah ban nang kiew na kawei ka por sa kawei pat ha ki kam ïalehkai ryngkat ki jingtrei shitom jong ki. “Ka jingkiew jong ki ha kane ka kam ka dei ruh lyngba ka jingbtin lynti bad jingaimynsiem na kiba ha ïing ha sem”, ong u bah Rutherford.
“Ym tang ha kane ka kynti ba mynta ba ka seng ka la ïoh ban pynkup burom hynrei ïa kiwei de ki samla kiba la wanrah ka nam ka burom kum ka seng ka la dep ban leh ïa la ka jong ka bynta”, pynsngew u bah Pauldeep. Namarkata, ki la buh ka jingkyrpad ïa ki MLA bad ki MDC jong ka South West Khasi Hills District ba ki dei ban leh ei ei lem ban thaw ki lad ki lynti kumno ban kin kyntiew ïa ka kam ïalehkai jong ki khun samla jong ka dong ka thaiñ.
Namarkata, ka KSU Mawkyrwat Circle ryngkat ka jingkyrkhu kyrdoh bad ka jingkitbok kitrwiang halor ka jingnoh synñiang bad ka nam ka burom ba ki la wanrah ïa ka dong ka thaiñ bad ka jaidbynriew kum ka seng ka sngewdei ban pynkup burom ïa ki baroh ar ngut ki samla kiba dei ki ‘rangïalehkai kynjatbol ha ka kynhun jong ka Meghalaya Football Team kaba la poi ha ka kyrdan kaba ar jong ka 76 Hero Santosh Trophy 2023 ba la pynlong ha Riyadh, Saudi Arabia. Ha kane ka sngi la ïadonlang naduh ki nongïalam jong ka KSU Mawkyrwat Circle bad kumjuh ki nongïalam jong ka KSU South West Khasi Hills District.