Ngan ïaleh katba lah ban pynurlong ïa baroh ki kam pynroi ha ka Constituency : Methodius Dkhar

Nongstoiñ, Ïaïong 3: Ka jingjop jong u bah Methodius Dkhar kum u MLA na ka 34 Mawshynrut Assembly constituency, kan long ka jingkyrkhu kaba khraw ïa ki paitbah nongshong shnong, namar hadien ba la dep thaw ïa ka sorkar bad ka Dorbar mang tyngka kaba nyngkong ka la kut, u la wan ban ïakynduh ïa ki paitbah nongkyrshan bad wat la um shym pat lah ban ïakynduh ïa baroh ki paitbah nongkyrshan ha ki zone bapher bapher. Hynrei u la lah ban ïakynduh ïa ki nongïalam bad lyngba jong ki u la phah ka jingkhublei ba kyrpang sha baroh ki paitbah ka constituency naduh ki nongkyrshan haduh ki bym shym la kyrshan ruh.
Haba ïakren bad utei u nongmihkhmat u la ong ba u kwah eh ban leit jngoh bad ïakynduh markhmat ïa baroh ki paitbah nongkyrshan, hynrei na ka jingbun kam palat um pat ïoh lad satia hynrei ynda u la kham lait por un ïaleh shitom ban pynpoi ha man la ki jaka hapoh ka constituency ba ïakynduh ïa ki paitbah.
Haba kylli ba u la phah ne em kino kino ki jingai jingmut sha ka sorkar na ka bynta ka roi ka par hapoh ka constituency, u bah Dkhar u la ong ba mynta u dang buddien ïa baroh ki kam kiba ka sorkar kaba la dep ka la pruid dak hapoh ka constituency. Hynrei kam shym pat la lah ban pynurlong bad u la ong ruh ba u la dep ai jingmut ïa ka sorkar ba hapoh san snem ka dei ban pynurlong lut ïa baroh ki kam kiba ka la dep pruid dak.
U bah Dkhar u la ong ruh ba nalor ki kam pynroi kiba ka sorkar ka la dep pruid dak, ki don ruh ki kam kiba thymmai kiba u la kyrpad ïa ka sorkar ba kan pynurlong na ka bynta ban tei ïa ka Residential School ha ka shnong Riangkhaiñ bad mang pisa biang na ka bynta ka surok Nongstoiñ-Maweit ka ban bteng naduh ka 23 kilomitar shaduh Maweit, Mawmarin, Porkhadoh, Sdaddkhar haduh Nongjri, khnang ba ki paitbah kin suk ka leit ka wan.
Nalor kata u la ong ruh ba u la kyrpad ruh ïa ka sorkar ba kan mang pisa na ka bynta ban pyndep noh ïa hynriew tylli ki jingkieng ha ka surok Shahlang -Riangdim bad ka sorkar ka la kular ba kan leh ïa kaba donkam. Ha kajuh ka por u la ong ba na ka bynta ban kyntiew ïa ka ïoh ka kot jong ki paitbah hapoh ka constituency, u dang pynkhreh shait shait ïa ki policy na ka bynta ban phah sha ka sorkar ba kan mynjur bad kan pyntreikam, khnang ba ka ïoh ka kot jong ki paitbah ha ka jylla baroh kawei kan kiew.
U la ong ruh ba u dang pynkhreh ruh ïa ki policy na ka bynta ban kyntiew ïa ki samla, namar lada ap tang ïa ki kam ha ki ophis sorkar kan shem jingeh haduh katta katta. Hynrei lada ka sorkar ka kwah ba ki samla kin kiew shaphrang ha baroh ki liang ka dei ban mynjur ïa ki policy ba u la pynkhreh. U la ong ba na ka bynta ban pynurlong ïa ka jingkwah jong ki paitbah hapoh ka constituency bad ha ka jylla hi baroh kawei, un ym shongthait ban tynruh ïa ka sorkar ba ka dei ban pyni da ki kam ym ban shu kren tang da ka ktien.