Nongstoiñ, Ïaiong 3: U MLA ka Rambrai-Jyrngam constituency u Remington Gabil Momin ha ka sngi u Blei u la leit sha ka office treikam u Sirdar Nonglang, Nonglang Sirdarship, ban noh synñiang ïa ki 25 ngut ki briew na ka shnong Malchapara kiba la ai jaka rieh shi por da u Sirdar Nonglang, hadien ba ki la phet rieh na ka daw jong ka jingwad kem khlem daw ki pulit Assam naduh ka 28 tarik u bnai ba la lah.
Hadien ba u sirdar Nonglang u la ïoh jingtip ïa kane ka jingphet wir sha khlaw sha btap ki khun ki riot jong u haduh 13 sngi, u la phah ïa la u secretary ka hima u shri Birbor Riangtem bad ki briew jong u ban leit khmih sha katei ka shnong.
Kumta ha ka sngi u Blei utei u MLA u la wan ban noh synñiang ïa kitei ki briew da u khaw, shini, dai, phan, ki biscuit bad kiwei ha ryngkat ka pisa ba 10,000/- sha kitei ki briew ha ka jingdon ryngkat u secretary ka hima Nonglang bad u myntri ka hima.
Halor ka jingtyngkhuh bad ka jingleit mih sha thanat Boko halor ka anticipatory bail jong kine ki 25 ngut la shai ka sngi, la hap ban pynkylla noh ïa ka tarik ban leit pynlong rally ha khmat ka secretariat kumba la buh por ha ka 28/03/2024 sha kawei pat ka sngi bad ïa ka tarik yn sa pyntip kham hadien.
Kumta na ka liang ka Hima ka kyrpad ïa ki paitbah nongkyrshan, ki NGO, ki nongsynshar hima ka Bri u Hynñiewtrep ban ïai shah haduh ban da pyntip pat da kawei ka tarik.
