Pynher lama u Bah Prestone ïa ka kynhun niah bike ki pulit Meghalaya ba leit shimbynta ha ka National Motorcycle Rally pyrshah drok

Shillong, Risaw 09: Ka jingïakhun pyrshah ïa u drok ha Meghalaya ka la ïoh ïa kawei ka jingpynshlur kaba khraw ha ka sngi Palei, haba u Symbud Myntri Rangbah ka Jylla ba dei peit ïa ka tnat Home (Police), Bah Prestone Tynsong, u la pynher lama ïa ki san ngut ki nongñiah thuk-thuk jong ki Pulit Meghalaya kiba mih bynta ha ka National Motorcycle Rally 2026.
Ka Rally kaba don ïa ka phang “Fight Against Drugs” kan ïaid lyngba palat 3,200 km bad kan kut ha Ekta Nagar, Gujarat, kaba long ka jaka ba don ka Statue of Unity, ha ka 31 tarik Risaw.
Haba pynher lama ïa ka kynhun, u Bah Prestone u la ong ba kane ka jingïaid kaba jngai ka pyni ïa ka jingkut jingmut jong ka Sorkar Pdeng bad ki Sorkar Jylla ban ïakhun pyrshah ïa ka jingeh jong u drok.
U la ong, “Nga pdiang sngewbha bad nga ai ïa ka jingkitbok ïa ki nongñiah thuk-thuk jong ki pulit. Ngi don ki nongñiah thuk thuk na Meghalaya, Mizoram bad na ka NCB. Ka jingïaid jong phi kan sdang shen. Ban ñiah palat 3,200 km kam dei ka kam kaba suk, hynrei nga ngeit skhem ba kane ka jingïaid kan pyni ïa ka jingkut jingmut jong ka Sorkar Pdeng bad ka Sorkar Jylla ban ïakhun pyrshah ïa u drok da ka rukom kaba kynthup ïa baroh ki liang.”
U la ong ruh ba ka Meghalaya ka la pynkhlaiñ ïa ki jingïakhun pyrshah ïa u drok da kaba thaw ïa ka kynhun kaba kyrpang, kata ka jingïakhun pyrshah ïa ka jingsam ïa u drok bad ka jingpynbha ne rehabilitation ïa kiba la ngat ha ka jingdih drok.
“Ha Meghalaya, ngi dang ïaleh katba ngi lah. Ngi la thaw lypa ïa ka kynhun kaba kyrpang hapoh ka jingïalam jong u SP, Anti-Narcotics Task Force (ANTF). Ngi dang shim ïa baroh ki sienjam ban ïakhun pyrshah ïa ka jingsam ïa u drok, bad ha kajuh ka por ngi ai ruh ïa ki lad ban ai jingïasyllok bad ban pynbha ïa kiba la ngat ha kane ka jingmlien kaba ma,” u la ong.
U Symbud Myntri Rangbah u la kyrpad ruh ïa ka kynhun ki pulit baroh ban duwai na ka bynta ka jingïaid kaba shngaiñ jong ki nongñiah.
U la ong, “Nga sngewkmen ban don hangne mynta ban pynher lama ïa kane ka Rally bad nga kwah ïa phi baroh ïa ka jingjop. Nga kyrpad ïa baroh ki pulit Meghalaya ban duwai lang na ka bynta ki nongñiah jong ngi, khnang ba kin poi suk sha ka thong bad wanphai biang sha ka Jylla da ka jingmynjur bad jingpynshlur na kane ka lympung jong ka ri kaban long ha ka 31 tarik mynta u bnai.”
U la bynrap da kaba kyrpad ïa baroh ban kynmaw ha ki jingduwai ïa ki nongñiah na Meghalaya bad na ka thaiñ Northeast baroh, khnang ba kin poi suk bad wanphai biang sha ka Jylla.
Ha ka jingïalang pynher lama la ïadonlang u Inspector General of Police (Law & Order), DNR Marak, u Additional Director General of Police, Anurag Agarwal, bad kiwei ki heh pulit.