Nongpoh, Ïaiong 03: Ka party NPP na Ri Bhoi District mynta ka sngi ka la pynkup burom ïa ki ar ngut ki MLA ka party kiba la jop ha kane ka election jied nongmihkhmat ba dang shu dep shen ha ka jylla, kaba dei hadien ba ki paidbah ki la pynkup bor ïa ki ba kin long kum kita ki nongmihkhmat paidbah na ki 2 tylli ki Constituency kiba don ha Ri Bhoi District.
Kine ki ar ngut ki MLA ba la pynkup burom da ka NPP Ri Bhoi District ki kynthup ïa u MLA ka Jirang, u Bah Sosthenes Sohtun bad u MLA ka Umroi, u Bah Damanbait Lamare.
Ha kane ka jingpynkup burom ïa kine ki ar ngut ki MLA kiba la jop ha kane ka election ba dang shu dep shen la sakhi lang ruh da ka jingdon lang u MLA barim ka Umsning, u Bah Jason Mawlong, u MDC ka Jirang, u Bah Victor Rani, u MDC ka Umroi, u Bah R.R Kharbuki, u President ka NPP Ri Bhoi District, u Babu Clement Mawlong, u Bah Shemphang Lyngdoh bad kynthup kiwei kiwei ki nongïalam bad ki nongtrei jong ka party NPP na Ri Bhoi District.
Ha kane ka sngi na ka liang ka party ka la ai burom ïa kine ki ar ngut ki MLA ka party kiba la pynjop da ki paidbah da ki jaiñ ryndia bad kumjuh ruh ki khusnam sah jingkynmaw ba kum ki nongmihkhmat paidbah kin dang lah ban trei shitom na ka bynta ban wan rah ïa ka jingkylla ym tang ha ki Constituency hynrei ha ka District hi baroh kawei.
Haba kren ha katei ka sngi naka liang kitei ki 2 ngut ki MLA ba kynthup ïa u Damanbait Lamare MLA ka Umroi bad u Bah Sosthenes Sohtun MLA ka Jirang kila pynpaw ka jingsngewkmen kaba khraw hadien ba kum ka party NPP na Ri-Bhoi naduh ki samla bad longkmie kila pynkup burom ïa ki hadien ba ki paidbah kila pynjop donburom ïa ki ha kane ka elekshon bala dep.
Kila pynpaw ruh watla ki kyrtong ka party kim shym la jop lut na baroh 5 tylli ki constituency, naka liang jong ki kin trei shitom ban wanrah ki kam pynroi haki constituency kumba la bynshet haki, haka jingtrei ryngkat bad ki paidbah bad ki nongïalam ka party.
