Nongpoh, Risaw 09: Hadien ka jingtwa khyndew kaba jur kaba la jia haka 2 tarik Risaw ha kawei ka petrol pump kaba don ha 10 mer ha Ri-Bhoi District, kaba la buh jingma ïa katei ka petrol pump bad ki jaka ba marjan, ka bor district Ri-Bhoi kala rai ban pynlong da ka jingjurip haka 12 tarik mynta u bnai ban lap ïaka daw jong ka jingtwa khyndew bad ka jingtih khyndew ha katei ka jaka.
Ka jingjur slap ha kine ki khyndiat sngi kan buh ka jingma ba khraw ha katei ka jaka khamtam ïaki mynsiem briew, kumta naka liang u Dr Abhishek Saini Deputy Commissioner ka Ri-Bhoi bad Chairperson ka District Disaster Management Authority, Ri-Bhoi District u la hukum ban khang noh ïa katei ka petrol pump, bad kam dei ban don kano kano ka jingdie bad theh umphñiang na katei ka petrol pump bad la khang ruh ban rung sha katei ka jaka lait noh tang ki ophisar bad ki briew kiba la ioh jingbit bad ruh kiba lah ban leit haka jingjurip.
La bthah ruh ïa u trai katei ka petrol pump ba un ker noh ïa katei ka jaka ryngkat ka jingmaham bad ym dei ban rung mano mano ruh sha katei ka jaka tad haduh ban da pynmih da kawei ka hukum. Yn pynlong ruh ïaka jingjurip lang haka 12 tarik mynta u bnai haba ïadei bad katei ka jingtwa khyndew bad ki bor ba dei peit, ryngkat u trai katei ka petrol pump ki dei ban bud ryntih ïa kane ka hukum naka bynta ka jingshngaiñ jong ki paidbah bad kane ka hukum kan treikam tad haduh ban da pynbna da kumwei.
