Shillong, Risaw 9: Ka District Disaster Management Authority (DDMA), East Khasi Hills District, ka la pynlong ha ka sngi Palei ïa ka jingai jinghikai bad capacity-building programme na ka bynta ki nongtrei mon sngewbha bad ki nongmihkhmat jong ki Durga Puja Committee bapher bapher ha shwa ka jingrakhe Durga Puja.
Ïa kane ka prokram la pynlong ha Meghalaya Bharat Scouts & Guides bad la pynleit jingmut ha kaba pynkhlain ïa ka jingshngain, ka jingpynkhreh bad ka jingiatreilang ha ka por lehkmen.
Ki Pulit Traffic ki la ai jingtip sha ki nongiashim bynta halor ka rukom pyniaid kali bad ki lad jingiada ha surok.
Ki briew jong ka Civil Defence ki la ai jinghikai halor ka jingpynkhreh na ka bynta ki jingjia ba sngewsih bad ka jingïarap kyrkieh, katba ki nongtrei mon sngewbha jong ka Aapda Mitra ki la pyni ïa ki rukom ïarap kyrkieh bad ki rukom ïada kiba donkam.
Ka jingïashim bynta shitrhem jong ki nongtrei mon sngewbha bad ki nongmih khmat jong ka Puja Committee ka pyni ïa ka jingshim khia lang ban pynthikna ba ka jingrakhe Durga Puja kan long kaba shngaiñ, kaba ïaid beit bad kaba lait na ki jingjia ha Shillong.
Ka jingthmu ka pynpaw ïa ka jingdonkam jong ka jingiashim bynta jong ki paidbah, ka jingpynsngewthuh bad ka jingpynkhreh ha kaba kyntiew ïa ka jingshngain jong ki paidbah ha ki por ba don ki jingialang kiba heh bad ki por lehkmen.
