Ai jinghikai ka NEHU ïa ka jingshem ki kynja dawai da kaba pyndonkam ka bording ha ka Nanotechnology Day

Shillong, Risaw 09: Ka tnad jong ka Nanotechnology, North-Eastern Hill University (NEHU), Shillong, ka la pynlong da ka jinghikai ba shi sngi halor ka jingshem ïa ki kynja dawai da ka bording na ka bynta ban rakhe ïa ka Nanotechnology Day.
Ïa katei ka projek, la pynïaid ha ka jingïatreilang bad ka Class One Systems S&T Pvt. Ltd. (PalmSens) bad la donlang ki dkhot nongtrei, riewshemphang, stad wad bniah bad ki samla pule ba kin ïa wad bniah shaphang ki katto katne kita ki nanotechnology kaba mut ka jingstad kaba pyndonkam ïa ki symboh kiba rit bha bad ki kor ki bor kiba tehlakam ïa ki jingkylla ba nyngkong lyngba ka bor electricity bad chemical, ha kaba ki dei ki lad thymmai kiba la wanrah ïa ka jingkylla kaba khraw ha ki lad ba nyngkong ban bishar bad tehlakam ïa ki jait jingpang, ka mariang bad ki mar bam mar dih.
U Prof. S. K. Barik, Vice-Chancellor-in-Charge ka NEHU, u la long kum u kongsan ha katei ka prokram. Katba ka Dr. Shruti Shukla, Head, Department of Nanotechnology, NEHU, ka la kren shaphang ka jingdonkam jong ki nanotechnology ha kane ka juk saïan ba mynta bad ka jingïadei bad ki sobjek kynthup ïa ka Physics, Chemistry, Biotechnology bad kiwei kiwei ki bynta jong ka Engineering.
Ka la ban jur halor ka jingwad bniah bad ka jingroi jong ki buit thymmai kaba la shim da ka tnad bad ka la ong ba ka long kaba donkam ban pynshai shaphang ka lad nanotechnology hapdeng ka imlang ka sahlang bad kane ka pateng jong ki khun samla.
Ka Dr. Shukla kala pynshai ruh shaphang ka jingbun jong ki nanotechnology bad nanoscience ha ki jaka kynthup ïa ki dawai dashin, ka rep ka riang, tiar bording bad kiwei ki bynta ba dang mih thymmai, ban pynshai ba kane ka lad ka don ka bor ban pynbeit ïa ki jingeh kiba mih ha ka imlang sahlang bad ha ka mariang ban kyntiew ïa ka teknoloji ha kane ka juk mynta.
Ha katei ka prokram, u Prof. S. K. Barik, Vice-Chancellor-in-Charge bad u kongsan u la ïaroh ïa kane ka tnad jong ka Nanotechnology na ka bynta ka jingpynlong ïa kane ka projek bad pynkynmaw ïa ka Nanotechnology Day.
U la pynshai ïa ka nanotechnology kum ka teknologi jong ka lawei ban wan kaba donkam ruh ka jingïatreilang hapdeng ki stad wad bniah kiba wad bniah ïa ka saïan naduh tyllong bad ki tnad jingtreikam ka saiñ teknoloji na ka bynta ban thaw ki lad ki lynti ban weng ïa ki katto katne ki jingeh kiba khraw kiba ka pyrthei ka ïakynduh mynta.
U Prof. Barik u la peit thuh ba ka nanotechnology kala nang long kaba donkam eh ha kylleng ki bynta jong ka saïan bad teknologi. U la ban jur ba ka jingwad bniah kaba ym dei tang ban shu kut lane shah khang hapoh ki kot ki sla lane ki jingpynmih kot kiba ïadei bad ka pule dangle, hynrei ka dei ban ïalam pynban sha ki mar ki mata bad ki kor ki bor ki ban pynmyntoi ïa ka imlang sahlang.
U la ai jingïaroh ïa ka tnad Nanotechnology na ka bynta ka jingtrei shitom jong ka ban nym sangeh kane ka jingwad bniah lem bad ka jingpynleit jingmut halor ki kam kiba lah ban pyndonkam bad ka jingbha ne jingsniew halor ka imlang sahlang.
Ha kane ka prokram, ka don bun ki bynta jong ka jingïakren shaphang ki teknikal bad ka jingïalang jingïakren da ki riewkhraw ka pule dangle bad ki riewshemphang ha ki kam karkhana, u Prof. Arup Jyoti Baruah, North Eastern Indira Gandhi Regional Institute of Health and Medical Sciences (NEIGRIHMS), Shillong, uba la kren halor ka jingpynïadei hapdeng ka nanotechnology bad ki dawai, ha kaba u la ong ba ka jingroi jong ka jingnoh synniang ka buit nanotechnology sha ka koit ka khiah bad ka rukom pyndonkam ïa ki tiar lane ki lad saïan ban pynkhiah bad ban sumar ïa ki jingpang.
Katba ka jingbatai da u Anshuman Mallick, Technical Director jong ka Class One Systems S&T Pvt. Ltd. (PalmSens), uba la kren halor ki electrochemical sensing platforms kaba mut ki rukom treikam bad ki tiar ban tehlakam bad ban buh jingkheiñ ïa ka jingmihding bad ki dawai ki kynja chemical bad ki rukom pyndonkam ïa ki har rukom ki bynta jong ka saïan bad ka teknoloji.
Ka jingai jinghikai bad jingpyni da kaba ktah bad pyndonkam hi da ki kti halor ki tiar electrochemical sensing la pynïaid da u Animegh Mondal, Class One Systems S&T Pvt. Ltd. (PalmSens). Kane ka sngi ai jinghikai kam ka la pynlong ïa ki samla pule bad ki stad wad bniah ban ïoh ka jingshem bad jingtip hi da la ki khmat bad ki kti halor ki rukom treikam bad ki jingpyndonkam ïa ki kor electrochemical sensing.
U Dr. Davidson Pyngrope, Department of Nanotechnology, NEHU, u la pyni ruh ïa ka jingïaid lynti bad jingïar jong ka tnad Nanotechnology ha NEHU. U la pynpaw bniah ïa ki kor ki bor bad ki jaka wad jingtip ba shakhmat (R&D) ba don ha kane ka tnad, kiba dei ki jaka ba kyrpang tam ha kane ka thaiñ bad u la pyni ruh ïa ki lad wad jingtip ba kongsan ba la ïalam khmat da ki nonghikai bad ki riew wad jingtip.
U Dr. Pyngrope u la pynshlur ruh ïa ki samla pule ba kin pyrkhat ban leit wad jingtip shuh shuh ha ka M.Tech. prokram ha ka Nanotechnology ha NEHU, da kaba pynpaw bniah ïa ki lad jingïar ba nang khie kiba donkam ha kane ka bynta bad ka jingpynbit pynbiang ha ki bun ki jait jingpule lyngba kane ka prokram.