Sdang ka Mawlangwir SC ïa ka Mawlangwir Inter-Dong Football League 2023

0

Mawkyrwat, Ïaïong 04: Ka Mawlangwir Sports Club, ha ka 01 tarik u Ïaïong, 2023, ka la ïoh ban sdang ïa ka Mawlangwir Inter-Dong Football League jong u snem 2023 kum shi bynta ban kyntiew ïa ka sap ïalehkai phutbol jong ki samla jong ka shnong Mawlangwir, South West Khasi Hills District.
Ïa kane ka lympung la plie da u President jong ka Sports Club, u bah S.K. Budnah, u ba la long ruh u kongsan ha katei ka sngi, ha ka jingïadon ryngkat u General Secretary bad ki para dkhot jong ka Mawlangwir SC. Haba kren ha kane jingplie ïa ka lympung, u kongsan u la kyntu ïa ki samla ïalehkai bad ïa ki samla baroh ba ki dei ban trei chitom. “Hooid, wat lada la katto kattne snem, khlem shym la ïoh shuh ban pynlong ïa ka lympung Inter-dong, hynrei ngi don ka jingkyrmen ba lyngba kane ka Inter-dong kaba mynta, ngin sa ïohi biang ïa ki samla jong ngi ba kin kiew biang ha ka kam ïalehkai phutbol”, u la ong.
Ki kynhun kiba ïa shimbynta ha kane ka lympung jong une u snem ki don phra tylli. Kita ki long ka Mawkohmoit, ka Lakhang, ka Larem, ka Shiliangktieh, ka Nongkrem, ka Mawbah, ka Eitser Dileiñ bad ka Eitser Mawjaih.
Ha kane ka sngi plie ïa ka lympung, la ïoh ban pynïalehkai ar tylli ki jingïalehkai, kawei hapdeng ka Mawkohmoit pyrshah ïa ka Eitser Mawjaih ha ka ba ka Mawkohmoit ka la jop da 8 kol la 0 bad kawei pat hapdeng ka Shiliangktieh pyrshah ïa ka Eitser Dileiñ kaba la kut hapdeng ka jingïakhaid ba mar shi kol (1-1).
Ha kajuh ka por, ka Sports Club lyngba ka Inter-Dong Committee ka la ïoh ban pynkup burom ïa u samla Chesterpaul Lyngdoh u ba long u wei u samla ïalehkai jong ka Mawlangwir Sports Club bad uba dei ruh u ‘rang ïalehkai ba la paw bha ym tang hapoh Meghalaya hynrei ha ka ri India hi baroh kawei.
Ha ka ba ïadei bad ka lympung Mawlangwir Football Community Shield 2022-23, ka Sports Club ka pyntip ba ka jingïalehkai Semifinal ka ba ar kan long lashai ka sngi, ka 04 Ïaïong 2023, hapdeng ka Azriel SC bad ka Nongbri Brothers FC, ha ka por 2 baje nohphai sngi, ha Madan Saitsnad.

Leave A Reply

Your email address will not be published.