Mairang, Lber 3: Kum shibynta ban pynshai bad pyni lad pyni lynti ïa ki khynnah pule ka Eastern West Khasi Hills District, halor ki lad ïohkam ïohjam ha ka liang ka tnat hospitality, kiba kynthup ïa ka ïohkam ïohjam lyngba ka kam jngohkai pyrthei, ka ophis jong ka Block Development Officer Mairang C&RD Block, ha ryngkat ka jingïatreilang bad ka Indian Institute of Hotel Management Shillong, hynne ka sngi ki la pynlong ïa ka prokram jingbatai bad jinghikai na ka bynta ki khynnah pule ka thaiñ kiba don jingthmu ban leit pule ha kane ka laiñ.
Ha kane ka prokram ïa kaba la pynlong ha Tirot Sing Memorial Hall Pyndengumiong Mairang, la wan ban ïashimbynta da I Dr. L.R. Hynñiewta, I ba long I BDO ka Mairang C&RD Block, u Bah S. Khonglah Lecturer ka IIHM, Shillong, I Kong S.Wahlang Demonstrator ka IIHM, Shillong, ki nonghikai bad ki khynnah pule jong ki skul bad kolej ka thaiñ, kiba kynthup ïa kito kiba la wan na ka Mairang Presbyterian Higher Secondary School, Mairang, ka Khadsawphra College, Mairang, ka St. Thomas Higher Secondary School, Mairang bad ka Myrïaw RMSA Higher Secondary School, Myrïaw.
Ka jingthmu jong kane ka prokram ka long ban hikai ban kdew lad kdew lynti ïa ki khynnah pule ka thaiñ, halor ki lad ïohkam ïohjam lyngba ka tnat jngohkai pyrthei, kaba long kawei na ki tnat kiba la nang kiew na ka por sha ka por lyngba ka jingïohkam ïoh kamai jong ki nongshong shnong.
Ha kane ka sngi, ki khynnah pule ka thaiñ ki la ïoh jinngpynshai ruh halor ki jait jingpule ïa kiba lah ban ïoh hapoh ka Indian Institute of Hotel Management, Shillong kiba kynthup ïa ka B.Sc in Hospitality & Hotel Administration, ki Diploma Course na ka bynta kito kiba lah dep ïa ka Class 12 bad ruh ki Short Term Certificate Course na ka bynta kito kiba lah dep ïa ka klas kaba 10.
