Ka Daw  Ka Jingwan Tuid Ki Briew Ba Nabar Hapoh Ka Jylla

0

Katba nang mih ki sngi ki ïa, ka jingwan  kyrthep jong ki mynder ha ki bynta bapher bapher jong ka ri bad bar ri, ka la buh shuh shuh ka jingeh ïa kane ka jaidbynriew ritpaid. Kane ka jingwan rung kyrthep jong ki mynder ka la wanrah ïa ka jingshong rit mynsiem jong ka jaidbynriew kiba long ki trai ri trai muluk ha kine ki dong ri lum. Kane ka la wanrah shuh shuh ïa ki jingeh bad jingkordit ïa ki khun samla bad pynkharoi ruh ïa kiba bun ki jingsniew. Dei ruh kaba la pynlong ïa kane ka ri kaba la long mynno ka ri tip briew tip Blei sha ka ri jong ki kam pyntriem bad jingïaumsnam.
Haba phai halor kine ki jingeh ba kane ka jaitbynriew ka la ïakynduh, hato ïano yn kynnoh. Kaba nyngkong lehse lah ban ong ba ka dei ka jingkitkhlieh jong ki nongsynshar hi ne ki bor sorkar kiba long ki nongpeit nongsumar ïa ka jingïaid beit jong ka synshar khadar bad ka shongsuk shong saiñ. Wat lada kita ki nongsynshar ki dei ki paradoh parasam, hynrei la ïohi kumba kim shym long satia kiba kit khlieh. Ka jingsynjor jng ki bor synshar na ka bynta ban peit ïa ka bha ka miat jong ka jaitbynriew hi ka long ka daw bah jong kane ka jingkynduh mawsiang ki trai ri trai muluk.
Ka Jaidbynriew Hynñiewtrep ka long ka jaidbynriew kaba ritpaid. Ka long ruh ka jaidbynriew kaba dang sahdien bad kaba dang donkam ïa kiba bun ki lad pynroi pynpar. Nalor ba ka long ka jaidbynriew ritpaid, ka long ruh ka jaidbynriew kaba shah ñiewbeiñ bad kaba shah thom beiñ ïa kiba bun ki liang bad ha kiba bun ki jadbynriew ba na shabar. Kane ka jaidbynriew ka don hapdeng ki jingeh kiba khraw bad hapdeng ki jingïaksaid na ka bynta ban pynneh pynsah ïa la ka jong ka hok nongkynti bad ka hok longtrai ha kane ka ri lum Khasi. Lehse dei ruh ha na kane ka daw ba sa mih kiba bun ki seng bhalang na ka bynta ban ïada ïa la ka jong ka jaidbynriew ritpaid, kaba don mynta ha tmier jong ka riat ba shyrkhei.
Lehse kane ka lah ban long na ka jinglong khuid ne kylluid mynsiem palat ki nongsynshar ne ka lah ban long na ka daw jong ka jingshah tap matlah ha kiwei kiwei pat ki jingshah pynbiej bad jingshah ïalam bakla. Ka jingbym shimkhia jong ki bor sorkar ne kito ki heh sorkar kiba long ki trai ri trai muluk ka la wanrah ïa ka jingjyllei jong ki mynder hapoh kane ka ri Hynñiewtrep, ha kaba mynta lehse wat ki trai ri hi ki la kylla long ki ritpaid hapoh la ka jong ka jylla ne ha la ka jong ka khyndew ka shyiap.
Na ka por sha ka por, khamtam ha ki por elekshon ki nongmihkhmat paidbah ki khlei ïa ki juban ba thiang ban trei na ka bynta ka bha ka miat jong ka imlang ka sahlang, ka ïoh ka kot bad kiwei kiwei da kaba buh ruh hakhmat eh ïa ka jaidbynriew. Hynrei kine ki juban baroh ki long khleiñ la thang jwat la bam. Shuh shuh nalor ki nongsynshar, ka jingbym shimkhia bad ka jingkheiñ shngaiñ jong ki trai ri trai muluk hi ka long ruh ka daw bah jong kane ka jingkordit bad ka jingshong syier ba kane ka jaidbynriew Hynñiewtrep ka ïakynduh. Ka jingdon ïa ka mynsiem isynei bad jingkylluid mynsiem palat jong ki briew Hynñiewtrep ka wanrah ïa kane ka jingroi bad jingjyllei ki khyllah jait bapher bapher kiba lah ban long ka jingma hadien habud ym tang ïa ki hynrei wat ïa ka jaidbynriew hi baroh kawei.
Ka jingai wai klumar, ka jingdie jaka pathar bad ka jingaikam aijam ïa ki nongwei shi sngi ka ai mynsiem bad pynshlur ïa ki ba kin shongneh ha kane ka bri u Hynñiewtrep bad ynda la slem slem bah haba ki la sngew trai kim salia shuh ban iuhroit bad thombor ïa ki trai ri trai muluk. Kumjuh ruh, ka mynsiem bishni bad ka jingbym ïarap para jaidbynriew ka long kawei napdeng ki jingeh ban kyntiew irat ïa u paid Hynñiewtrep.

Leave A Reply

Your email address will not be published.