Pynher lama u Bah Paul Lyngdoh ha ka jingrakhe ïa ka Republic Day ha Ri Bhoi

0

Nongpoh, K’lyngkot 27: Ka ophis u Deputy Commissioner ka Ri Bhoi ryngkat ki tnad treikam sorkar bapher bapher ki la rakhe ïa ka Republic Day kaba 76 ha ka Sngi u Blei ha Madan Pahamsyiem bad u myntri ka tnad sorkar ba dei peit ïa ka tnad Tourism, u Bah Paul Lyngdoh u la wan ban pynher ïa ka lama lai rong kum u kongsan.
Ha kane ka jingrakhe la don ryngkat naduh u MLA ka Nongpoh u Bah Mayral Born Syiem, u Deputy Commissioner ka Ri Bhoi u Abhilash Baranwal, u SSP ka Ri Bhoi u V.S Rathore, ki heh ophisar, ki khynnah skul bad ki riew paidbah kiba la wan ban shim bynta shitrhem na ka bynta ban leh burom ïa kane ka sngi kyrpang.
Ha kane ka sngi, ka kynhun ki Pulit, ki kynnah skul, ki la shim bynta ha ka March bad ki tnad sorkar ki la pyni ïa ka jingpynriam ba la tip kum ka Tableau halor ki jingpyntreikam bapher bapher bad ryngkat ki jingshad tynrai ban pynphuh pynphieng ïa kane ka sngi kyrpang.
Ha ka March-past ka Band jong ka St. Paul’s Hr. Sec. School Band ka la ioh rah ïa ka nam lahduh, bud sa ka St. Paul’s Hr. Sec. School Boys & Girls ha ka kyrdan baar bad ka JNV Sec. School Niangbari Girls ha ka kyrdan kaba lai.
Ha kaba ïa dei bad ka jingpyni nam ïa ki Tableau ka tnad Soil & Water Conservation, Nongpoh, ka la rah ïa ka nam lahduh, bud sa ka District Rural Development Agency (DRDA) ha ka kyrdan ba ar bad ka tnad Agriculture ha ka kyrdan kaba lai.
Haba ai jingkren ha kane ka sngi kum u kongsan, u Bah Paul Lyngdoh u la pynkynmaw ïa ki riewkhaw kiba la len lade ïa ka la ka jingim, ba ka ri India ka la ioh la ka jong ka jinglaitluid bad ruh ka riti synshar hapoh ka ri ha ka jingïaid lynti kaba la kot sha ka 76 snem.
U la pynpaw ruh ba dei lyngba ka jinglen lade naduh u Mahatma Gandhi, u Jawaharlal Nehru, u Dr. Ambedkar, u Kiang Nongbah, u Tirot Sing bad kiwei kiwei ki riewkhraw, ba ka jinglen lade jongki, ka la pynlong ïa ka ri ban ioh ïa kata ka jingsynshar laitluid ba la tip kum kata ka ‘Democracy’
U Bah Pual Lyngdoh kum u myntri sorkar, u la kren ruh halor shibun ki kam pynroi ba ka sorkar ka la pyntreikam hapoh ka jylla lyngba ki skhim bapher bapher. U la kyntu ruh ban don kata ka jingkitkhlieh kum kita ki nongshong shnong ba pura ka ri na ka bynta ban ïa trei lang bad ban kyntiew ïa la dong ka thain na ka bynta ka jingkylla ba ki paidbah kin dang kiew shaphrang ha ki liang baroh lyngba ka jingtreikam ba ka sorkar ka la buh thong.

Leave A Reply

Your email address will not be published.