Haduh T. 77 hajar ïoh lum khajna ka tnad Pulit Ri Bhoi na ki Kali ba pynkheiñ ha Ri Bhoi

Nongpoh, K’lyngkot 27: Ka tnad Pulit na Ri Bhoi ha ka jingbthah u Senior Superintendent of Police (SSP) ka Ri Bhoi, ha ka sngi U Blei kaba ïa tyngkhuh ruh ïa ka jingrakhe ïa ka Republic Day, ka la ïoh ban lum khajna haduh T. 77 hajar, ïa ki Kali kiba pynkheiñ aiñ bad khamtam ki Kali ar shaka kiba ju pynher klumar ïa ki Kali ar Shaka ha ka Surokbah National Higway-6 ha Ri Bhoi District.
Kane ka jingïoh lum khajna, ka dei ha ka jingbat ïa ki Kali saw shaka bad khamtam ki Kali ar shaka ba la pynlong ha Nongpoh bad ha Umsning, ba ka tnad Pulit ka la tehpyrkhing bha shi bynta ban ïada na kino kino ki jingjia ba sngewsih kaba dei tang na ka daw ka jingñiah bad pynher sted ïa ki Kali ha kane ka surokbah ha Ri Bhoi District.
Kumba la ïathuh da u SSP ka Ri Bhoi, u V.S Rathore, la ong ba ha kane ka jingbat ïa ki kali ar shaka bad ki kali saw shaka, la dain kuna lyngba ka E-challan bad haba kheiñ kyllum na Umsning bad na Nongpoh ka la poi ka jingïoh lum khajna haduh T. 77 hajar na ki 63 tylli ki kali ba pynkheiñ aiñ, kiba ym deng ïa ki Helmet bad ki seatbelt.
Haba pyntip sha ki lad pathai khubor, u SSP ka Ri Bhoi, u V.S Rathore, u la ong ba la pynlong ïa kane ka jingtehpyrkhing ïa ki Kali kynthup naduh ki ar shaka haduh ki saw shaka, ka dei namar ba bun ki kali ki pynkheiñ aiñ bad kim ju bud ïa ki kyndon ba la buh da ka sorkar, kaba la ju wan rah ruh shibun ki jingjia ba sngewsih.
Shuh shuh, na ka bynta ban don ka jingshngaiñ naduh ki nongñiah bad ki nongshong kali la ki dei ki ar shaka ne saw shaka, ka tnad Pulit Ri Bhoi ka kyntu ïa kiba haïing hasem, ki lok ki jor bad baroh ki nongshong shnong ka Ri Bhoi ban ïa snoh kti lang bad ka tnad Pulit Ri Bhoi khnang ba nangne shakhmat kin nym mih ki jingjia ba sngewsih bad ruh ka tnad Pulit kan dang ïai beng ban dain kuna lada dang don kita ki kali ba pynkheiñ aiñ, u la bynrap.