Thaw ka sorkar da ka MECDM kaba dei ka jingroi ba pura jong ki khynnah

Shillong K’ Lyngkot 27: U Myntri Rangbah ka Jylla Meghalaya u Conrad K Sangma u la ïathuh ba ka Jylla ka la thaw ïa ka Meghalaya Early Childhood Development Mission (MECDM) kaba pynleit jingmut ha ka jingroi ba pura jong ki khynnah naduh ba dang kha haduh 8 snem bad ki longkmie ba armet ba dang ai buiñ, da kaba pynsan ïa ki jingtbit, ka jingroi ka bor pyrkhat, ka koit ka khiah, ka jingbam ba tei met, bad ka jinghikai naduh dang khynnah.
Haba kren ha ka jingrakhe Republic Day ba 76, u la ong, “Ngi thmu ban kyntiew kyrdan ïa ki Anganwadi Centre sha ki Saksham Anganwadi na ka bynta ka jingsumar bad jinghikai ïa ki khynnah rit kiba mynta bad ban ai jinghikai ïa ki 10,000 ngut ki nonghikai na ka kynhun SHG ba kin kyrshan ïa ki kam jong ka ECD Centre bad ban buh ïa ki Anganwadi Centre kiba thymmai ha ki skul primary sorkar na ka bynta ban pyntreikam ïa ka NEP. 2020”.
Haba ïathuh halor ka jinghiar ka jingïap jong ki longkmie ba kha khun da palat 53% bad ka jingïap jong ki khunlung ba dang kha da 40% ha kine ki san snem ba la dep, u Conrad u la ong, “Ki jingkha khun ha ki jaka sumar jong ngi ki la nang kiew bha namar ka jingïarap hapoh ka skhim Chief Minister Safe Motherhood Scheme, ha kaba palat 3 lak ngut ki longkmie kiba armet ki la ïoh jingmyntoi na ka jingleit buh leit shaw, ka jingpeit bniah bad ka jingshakri ban pynkha khun. Ngi shim ïa ki jingshakri ha ka koit ka khiah kham jan sha ki paidbah da kaba pyntreikam ïa ki First Referal Unit ha ki Community Health Centre.”
Na ka liang jong u, u la ïathuh ruh ba ka Sorkar ka la dep kyntiew kyrdan ïa ki CHC sha ki FRU thymmai ha Bhoirymbong, Resubelpara, Ranikor, Mawphlang bad ha Pynursula. Haduh 65 tylli ki Sub Centre thymmai la lah ban pyndep ha kane ka shisnem ba la dep, bad ka jingthmu ka long ban pyndep ïa ka jingtei sa 90 tylli ki Sub Centre thymmai ha kaba kut jong u snem 2025.
Shuh shuh u la ong ba ka tnat ka koit ka khiah ka la pynroi ïa ka jingïatreilang bad ki tnad jong ka pyrthei ban wanrah ïa ka jingnang jingstad, ka jingtbit, bad ka jingbei tyngka ha ka tnad ka koit ka khiah ha ka jylla.
“Ha ka MHIS la ïohi ïa ka jingbun tam ki jingïarap pisa ha une u snem ba la dep kaba pyni ïa ka jingshaniah ha ka rukom treikam. La buh ruh ïa ki Medical College ha Shillong bad ha Tura ryngkat ka plan ban shim 100 ngut ki samla pule MBBS ha ka shi snem ha kawei pa kawei ka kolej. Ka Shillong Medical College kan sdang treikam naduh mynta u snem,” ïathuh u Myntri Rangbah.
Halor ka pule puthi, u la ong ba ka sorkar ka angnud ban pyntihkna ïa ka jingpule kaba kham bha bad ban kyntiew ïa ka pule puthi ha ka jylla Meghalaya. Khamtam eh da kaba pynleit jingmut ban kyntiew ïa ka jingpass bha ki khynnah, ha kaba ka sorkar ka la sdang ïa ka buit thymmai ban sam ïa ki guide book lyngba ka ‘CM IMPACT’ na ka bynta ki khynnah skul bad kumjuh ruh ki nonghikai.
“Mynta u bnai ngi la plie ïa ka University ba nyngkong eh ka Jylla-ka Captain Williamson Sangma State University. Ka University Grants Commission ka la ithuh ïa ka jingseng ïa kane ka University katkum ka section 2 (f) jong ka UGC Act, 1956. Ka jingïasoh bad ka skulbah jong ka jylla kan pynthikna ba ki samla pule kin nym donkam ban leit ïakhun ïa ka eksam Common University Entrance Test (CUET) na ka bynta u snem 2019,” pyntip biang u Myntri Rangbah ka jylla.