Shillong, Rymphang 06 : U Samla Lambokstarwell Marngar ha ka 4 tarik Rymphang 2023 u la ïoh ban leit pynhap pyrda noh ïa ki ar tylli ki lympung ba la pynïaid da ki ar tylli ki shnat treikam kiba hap hapoh ka jingpeit jong ka KSU Mawlai Circle. Ha ka nohphai sngi utei u Samla Rangbah u la ïoh ban leit kum u Kongsan ban pynhap pyrda noh ïa ka Mawlai Nongkwar Inter dong Knockout Football Tournament ba la pynïaid da ka KSU Mawlai Nongkwar Unit kaba la sdang naduh ka 10 tarik Kyllalyngkot 2023 ha ka jingïa synran u samla Mac Iver Thabah Vice- President KSU Mawlai Circle.
Ha katei ka Tournament lawan ïashim bynta da 22 tylli ki kynhun na ki dong bapher bapher kiba don ha ka Shnong Mawlai Nongkwar, ki kynhun kiba poi ban ïaknieh ïa ka nam lahduh ka long ka Kongrit Lyngkot FC pyrshah ïa ka Block 2 ha kaba ka Kongrit Lyngkot FC kala ïoh ban rah ïa ka nam lahduh da kaba pynliem ïa ka Block 2 da 2-1 kol bad rah ïa ka song pisa ba 15,000 tyngka ha ryngkat bad ka Trophy katba ka Block 2 ka la khung ïa ka song pisa ba 10,000 tyngka ryngkat bad ka Trophy. Hashwa ban sdang ka katei ka jing ïaknieh nam lahduh ka la don shwa ka jing ïalehkai paralok hapdeng ka KSU Mawlai Circle pyrshah ïa ka KSU Mawlai Nongkwar Unit ha kaba ka KSU Mawlai Circle ka la ïoh ïa ka nam jop bad ïohrah da 2 tylli ki syiar.
Haka por janmiet na ka liang utei u Nongïalam ba Rangbah jong ka Seng u la ïoh ban leit pynhap pyrda noh sa ïa ka Mawlai Syllaikariah Week ba la pynïaid da ka KSU Mawlai Syllaikariah Unit kaba la sdang naduh ka 31 tarik Kyllalyngkot 2023. Ha katei ka sngi la synran ïa u Kongsan da u samla Biangbor L.Paliar President KSU Mawlai Circle uba dei ruh u Vice-President jong ka KSU Sengkmie kum u Symbud Kongsan.
Haba ai jingkren ha kitei baroh ar tylli ki lympung na ka liang jong u Kongsan bad ki Symbud Kongsan kila pynpaw ba kum ka Seng hi ka ju kyntu ïa manla ki shnat treikam ban kin pynlong ïa kiba kum kitei ki lympung kaban long shi bynta ban ai mynsiem ïa ki hep barit bad ki khun Samla bad ruh kan long ka jing ai rynsan ïa ki ba kin pyni ïa la ki sap bad khamtam eh ba kan long ka jing bunkam ïa ki jabieng jong ki bad ba kin lait na ka jing pynleit jingmut ha kiei kiei kiba sniew bad kiban long ka jing ma ïa ka Shnong ka thaw ka imlang ka sahlang bad khamtam eh ïa ka Ri bad ka Jaidbynriew hi baroh kawei.
Shwa ba kin shong bad pynkut ïa la ki jingkren naka liang kitei ki nongïalam kila ai ka jing ïaroh ïa kitei ki ar tylli ki shnat treikam kiba la trei shitom met bad mynsiem ban pynlong ïa kitei ki ar tylli ki lympung ïakob kaba jop bad ïaid beit ïaid ryntih.
Kane ka long katkum ka Kyrwoh na u Samla MacDonald Jitem Publicity Secretary KSU Mawlai Circle.
