Shillong, Rymphang 06 : Ka West Jaintia District Sports Association kaba la pynïasoh bad ka Meghalaya Athletics Association (MAA) ka la jied ïa ki san ngut ki nongïalehkai Athletics kiban mihkhmat ïa ka jylla Meghalaya sha ka lympung ïalehkai ha Patna, Bihar kaba la tip kum ka 18th National Inter District Junior Athletics Meet (NIDJAM).
Katei ka lympung kan sdang naduh ka 10 tarik haduh 12 tarik mynta u Rymphang. Ha katei ka lympung kin don haduh 500 tylli ki District na kylleng ka ri India kiban sa ïashim bynta.
Ki san ngut ki nongïalehkai kiba la shah jied ban leit mihkhmat ïa ka jylla sha katei ka lympung ki kynthup u Dayoophika Rymbai uban sa ïakhun ha ka 1600 meters,Wailuti Lyngdoh Shot Put, Damang i Lyngdoh 160 meters, Ram Shylla 1600 meters bad Iohiksan Lyngdoh ha ka 80meters, bad baroh kidei ha ka jingïalehkai jong ka kyrdan U-16.
Ïa kane ka kynhun yn ïalam da u Bah Pleasantly Synnah kum u Coach bad Manager. Na ka liang ka Meghalaya Athletics Association lyngba u Bah Finaly L Pariat uba dei u General Secretary, ka ai khublei ïa ka WJDSA kaba leit ban ïashim bynta bad kyrkhu kyrdoh ïa baroh ki nongïalehkai ba kin ïoh kheit ïa u soh jong ka jingjop.
