Pynbna u Bah Pala ban ïakhun ïa ka elekshon MLA na Sutnga-Saipung

Khliehriat, Nohprah 28 : U bah Vincent.H.Pala uba dei u M.P. jong ka Lok Sabha, uba dei ruh u nong shong shnong jong ka East Jaiñtia Hills District, u la ïathuh ba mynta u la pynkhreh shaid shaid ban ïakhun ïa kane ka election jong ka Meghalaya Legislative Assembly ka ban long ha u snem 2023 bad pyntikna ruh ba un ïa ai reng na ka Sutnga-Saipung Constituency ha kaba un ieng na ka party Congress “Nga ïohi ba kane ka constituency (Sunga-Saipung) ka dei shisha ka constituency kaba heh tam ka jing ïar ha Meghalaya.
Ha kaba ïadei bad ki mat kiba ïadei bad ki karkhana coke, u bah Pala u la kren shibun kiei kei bad kynthoh jur ruh ba ka dei ka jingbakla jong ka sorkar hi, khamtam kito kiba na ka party NPP bad ka party UDP.
Haba kaba ïakren bad u Mawphor, u bah Vincent Pala, u la ïathuh ba u la poi la jan man ki shnong kiba don hapoh ka Sutnga-Saipung Constituency bad u la ïakynduh bun ki briew “Don ki briew kiba ong ba ngan nym ïaleh ïa kane ka election, un nym wan ïalap election bad kaba eh ban ïakynduh, hynrei ha ka jingsisha mynta la lai bnai lynter nga la ïaid la jan man la ki shnong, ki don ruh ki shnong kiba nga la rung lut man la ki thliew ïing, te kumta ban ong ba ngan nym ïaleh ïa ka election kam dei kaba shisha” u la ong ruh ba ha ka jingïaid lynti jong u kum uwei na ki nongmihkhmat, u la la lap ba ki briew shisha ki sah ha ka umdum ha kaba ïadei bad ka roi ka par khamtam eh ka jinglong jingman ki lynti ki syngkien kiba ha ki thaiñ khappud bad kumjuh ruh ha kitei ki thaiñ Saipung kumjuh ruh kiba ha ka elaka Sumer bad elaka Narpuh, kumta u la kular ba lada u ïoh ïa ka jingjop bad lada u poi sha ka thong un shim khia nyngkong eh ban pynbit pynbiang ïa ki surok, ki lynti ki syngkien bad kum u nongmihkhmat u don shibun ki jingangnud ban ïarap ïa kiba duk bad ban kyntiew ïa ki.
Kawei ruh ka jingangnud jong u lada u poi sha ka thong, ka long ban kyntiew ïa ki paidbah nongrep, naduh kito kiba rep kwai, rep tymmew ha ki thaiñ ri War, kiba rep synsar, haba kren shaphang ki nongrep, u la pynpaw da ka jingsngew khia ba “katno ka jingjynjar jong ki na ka daw ki policy jong ka sorkar, kumjuh ruh kiba rep kba, kiba rep synsar, kumjuh ruh kito kiba don ha ki thaiñ Saipung kiba rep ha ki jaka jong ka Forest, ka jingshah pyndik ki nongrep ha ki briew jong ka tnat Forest, watla ka aiñ la dep pass ba kito kiba rep ha ki Reserve Forest ki lah ban trei ïa ka kam khlem shah pyndik”
Ha kaba ïadei bad ka kam dewïong, u bah Pala u la ong ba “Nga kyrmen ba lada nga poi ha ka jingjop ngan peit lem ia ki jingeh jong ki paidbah, namar kumba long mynta u dewïong u dei u jong ngi, khamtam uba na elaka Sutnga, elaka Sumer elaka Rymbai, elaka Narpuh katba hap siew pat sha secreteriat da ki lak-ki lak tyngka, don kiba ong ba ki hap ban siew haduh T 95000 hajar shi trok tang hapoh Meghalaya, T 30000 hajar tyngka ha Assam, u dewiong u dei u jong ngi katba ka pisa pat hap ban siew haduh kumba T3000 ha ka shiton tang ha ki bor sorkar kiba ha ki uniform, kata ka dei tang ka jingshah pyndik ki briew jong ngi hangne”
“Ban ieh ïa ka kam MP ban ïaleh ïa ka MLA kam dei ka kam kaba suk ban shim ïa ka rai ha kaba nga ruh nga shem jingeh, hynrei nga pyrkhat ba lada nga biang ma nga, biang ki khun ki kti jong nga kam myntoi ha ka jingim nga dei katba lada u Blei u ailad bad lada ki paidbah ki ailad, nga kwah ban shakri ha kata ka rukom ba kiwei kiwei ki briew ruh kin kham suk, nga kyrmen bad nga ngeit skhem namar haba nga ïaid shaneng sha rum haba nga ïaid kylleng ki jaka nga ïohi ba ki briew ki kwah hi ïa nga ba ngan ïaleh election bad ki kwah ba ngan jop hi ruh bad tang kawei ka long ba nga hap ban trei shitom bad nga kyrmen ba ngan poi sha ka thong”
Haba kren pat shaphang ki mat kiba dei bad ki karkhana coke kiba don ha East Jaiñtia Hills District, u bah Vincent.H.Pala u la ong ba “Kawei kaba nga kwah ban pynbna bad ban pyntip paidbah, ka long ba nga ïohi haba nga la wan sha Narwan, Sutnga, Moopala, Tluh, Latyrke, kaba isih eh dei kine ki karkhana coke”.
U la ong ba ha ka jingshisha lah ban pynduna ïa ka tdem lada bud ïa ki policy bad ki kyndon kiba biang, ki soh, kum ki soh na shnong Narwan bad na kiwei kiwei ki shnong, kum na Moopala mynta ki iap lut, ki dieng kseh kiba don shajan ki karkhana coke ki iap lut bad kane baroh ka dei ka jingbakla jong ka sorkar, namar ka la shu shim pisa klumar na kito kiba pan license,ki don bun ki coke kiba dei trai da ki khar kaia bad ki ba na bar, ki trai shnong ki shu shah kyrteng, kim tip ïa kaba bha ka miat,.
Shuh shuh u la ong ba ki Rangbah Shnong ruh ki la shu ai syrnot NOC klumar, nga la kynduh bun ki Rangbah Shnong, ki la ïathuh bad ong ba kim shym poi pyrkhat ba kan sniew haduh katne katne” bad u la ong ba lada u poi sha ka thong bad don ha ka bor un pynbeit bad pynbha (correct) ïa kane ka rukom, ha kaba kito ki coke kiba dei ban pynduh, ki dei ban duh noh bad kiba dei ban ïoh pat ki dei ban pynbiang noh ki kot ki sla, ki dei ban pynbiang ïa ki kor ki bor (machine) ban pynbit pynbiang bha.
Ula ong ruh ba u sngew-tynnad lada ki wan ki karkhana (industries), ki factories hynrei ym dei pat ban jynjar ki briew, namar ha kaja ba ngin im lang hynrei kumba long mynta ki don ki shnong ba tang ban thiah ruh kim lah namar ka jingsma namar ki thang mynmiet mynmiet, kane ka dei ruh kawei ba ngi hap pyrkhat bha kum ki nongmih khmat bad kane ka dei ruh ka jingbakla jong ka sorkar khamtam na ka liang ka sorkar ba kynthup lang bad UDP bad NPP bad kiba bat ïa ki karkhana ki dei ki party NPP bad ma ki pat tang ban ïoh pisa na ka bynta ban biang ka kam jong ki, ki shu pyllait klumar khlem pyrkhat shuh ïa ka koit ka khiah ïa ka bha ka miat jong ki paidbah,. “Nga kyrmen ba ki paidbah ruh ki sngewthuh ïa kane, kumta ngin ïatreilang bad ki paidbah na ka por sha ka por” pynpaw u Bah Vincent.H.Pala.