35 – 40 ngut ki kyrtong MLA yn pynbna ka Congress mynta ka sngi, bun ki dur khmat thymmai

Shillong, Nohprah 28 : Ka Congress mynta ka sngi Palei kan pynbna palat 35-40 ngut ki kyrtong ha ka thup kaba nyngkong, kiban aireng ïa ka elekshon MLA kaban long ha u snem ban wan.
Ki tyllong khubor ba ïajan bad ka Congress ki ïathuh ba na kitei ki 35-40 ngut ki kyrtong kiba yn pynbna ha kane ka sngi, khambun kin dei na rilum Khasi, katba na ka bynta ki 20 – 25 tylli ki constituency kiba dang sah pat kin sa pynbna ha ki khyndiat sngi ban wan.
La ïathuh ruh ba kiba bun na ki kyrtong kiba yn pynbna ha kane ka sngi, bun ki dei kiba ki paidbah ki la ithuh lut ha kaba katto katne na ki, ki dei ruh ki nongmihkhmat ha ki District Council.
Katto katne na kitei ki durkhmat ba kham paw ki kynthup naduh u MDC ka Pynthorumkhrah, Bah PN Syiem, nangta MDC ka Mylliem Bah RV Lyngdoh, MDC ka Mawhati, Bah Charles Marngar bad bun kiwei kiwei.
Ki thymmei khubor na ka party ki la kam ruh ba na kane ka thup ba nyngkong jan baroh ki kyrtong ki poi ha ka jingïakhun phainal bad kumba 30 ngut ei ei ki don ka jingkyrmen wat ba kin ïoh ïa ka jingjop.
“Watla ngim pat kwah ban pynpaw kyrteng hynrei ki don katto katne tylli ki constituency kiba ngi la sngewshngaiñ lypa ba ngin jop ha kane ka elekshon mynta ka kynti,” ong ki nongïalam ka party.
Haba ïadei pat bad ka thup kyrteng kaba ar, la pyntip ba kane kan kynthup kham bun ki constituency na rilum Garo bad ïa kane ruh shen kin sa pyllait noh.
Lah ban kdew hangne ba ka Congress kan leit sha ka elekshon khlem da don shuh iwei ruh i MLA ban ïakhun biang na ka party hadien ba 12 ngut ki la mih ban leit sha ka Trinamool Congress, bad nangta pat sa san ngut kiwei pat ki MLA ki la rai na krih sha ki party bapher bapher kynthup sha ka UDP bad ruh sha ka NPP.
Tad haduh mynta, na ki 5 ngut ki MLA ba shah sospon ha ka Congress, arngut ki la dep ban pynïasoh sha ka NPP katba arngut kiwei pat kin leit sha ka UDP katba uwei pat shen un sa pynïasoh sha ka NPP.