8000 tylli ki kam ba lait khlem thung, shano pynlut ka tulop, hato ki siew ïa ka ram: George

Shillong, Nohprah 28: U Vice President jong ka Meghalaya Trinamool Congress, u Bah George B. Lyngdoh u la ther tyngeh ïa ka jingtreikam ka sorkar MDA da kaba buh jingkylli halor ka jingbym lah ban thungkam ha ki palat phra hajar tylli ki kam ba lait ha kine ki saw snem baladep.
ïa kane u la pynpw haba kren ha ka jingïalamh jong ka TMC Mawphlang Block kaba la long mynta ka sngi ha Mawngap ban pynbna ïa ka jingmih u Bah Mawkordor Rynjah ban ïakhun na ka Seng TMC ha ka elekshon MLA 2023 na Mawphlang Constituency.
“Nga kwah ban kylli na ka sorkar ba la lam khmat da ka NPP shano ka buh ïa ka pisa bala mang kum ka tulop na ka bynta ki phra hajar tylli ki kam ba lait kiba kane ka sorkar kam shym la lah ban thungkam”, la ong u MLA jong ka Umroi.
U Bah George u la ong ba u sheptieng ïoh ba kane ka pisa kaba la mang kum ka tulop, kane ka sorkar MDA imat ka siew noh ïa ka ram kaba ka la shim mynta la palat 12 hajar klur tyngka na ka bynta ban leit kop kylleng kylleng ban leh ïa ki kam pynroi.
Shuh shuh haba kren halor ka jingeh ki samla ha ka ïoh kam ïoh jam, u la ong ba ki Samla kiba la aplai kam Pulit ki ladep mareh naduh u 2019, hynrei ïa ka result dang pynbna ha u snem 2022. “Haduh lai snem ka la shim por ïa ka sorkar ban ai result?. Mano ban buria ïa ki lai snem ba ki Samla ki la duh ei ïa ka tulop ne ïa ka por jong ki”, u la ong.
Ha kaba ïadei bad ka jingpyntreikam ïa ka WeCard ne ka jingïarap ba ka TMC ka kular ban ai sha ki longkmie lada ka wan ha ka bor synshar, u Bah George u la ong ba ka TMC haba ka leh ïa kane, ka da thmu shisha ban pyntreikam bad kam long kum kiwei pat ki Party kiba shu jied tang ïa ki briew ne ki nongtrei la jong ban pyntreikam ïa ka skhim FOCUS kaba san hajar tyngka, kata ruh tang shisien ai, hynrei ka TMC kan ai baroh san snem mar shi jajar tyngka shi bnai ïa kawei ka kynthei na kawei kawei ka longïing.
U la ong ba ha ka por ba long Myntri Rangbah u Dr. Mukul Sangma la pyntreikam ïa ka skhim Smart Card kaba dei ka jingïarap ïa kiba pang ba shitom ha baroh kawei ka jylla. “Ka dang kham shitom shibun ban pyntreikam ïa kane ka skhim Smart Card ban ïa ka WeCard”, u la ong.
U la ther ruh ïa ka Seng BJP kaba la wanrah ïa ki jingtreikam ban khñiot beiñ ïa ki Khristan bad ïa kiwei kiwei de ki niam rit paid. U la ong ba ym slem shuh kumba long ha Assam, hangne ruh ka la don ka jingsdang wad jingtip halor ka jingdon ki ïingmane, ka jingdon ki dkhot Committee Balang, nangta ki treikam aiu bad kiwei kiwei.
“Lada ngi ailad ïa ki Party kiba ïatreilang bad la BJP ha ka MDA mynta, khlem pep ngin mad jingeh wad ha ka jinglaitkluid ban shakri Blei ruh”, u la ong.
U la ong ba dei satang ka TMC kaba lah ban ïakhun pyrshah ïa kine ki kam thombor jong ka BJP.