Kiwei ki Party ki wanrah jingmyntoi sha jylla, ka NPP na Meghalaya shabar jylla: Jambor

Mairang, Nohprah 28 : U MDC jong ka Mawthad-raishan bad General Secretary ka UDP Mawthadraishan, u Bah Jambor War, haba kren ha ka jingïalang jong ka UDP Mawthadraishan dang shen ha Tiehnongbah, ula ong ba ki paidbah kim dei ban sngap ïa ki jingkam jong ka NPP ba ka la wanrah bun ki kam pynroi, pynban kane ka Party ka kamai nangne bad leit rah sha kiwei pat ki jylla na ka bynta ban pynheh bad pynroi ïa ka Party sha kiwei pat ki jylla.
U EM ba peit ïa ka Elaka, u la ong, “Kiwei ki Party kum ka Congress, ka BJP ki wanrah skhim na Delhi sha ka jylla, katba ka NPP pat ka rah ïa ka spah nangne sha kiwei pat ki jylla”. Nangta shuh shuh u la ong ba haba leit pynlong jingïalang sha Garo Hills, kiba bun ki briew shathie ki kheiñ ba ka UDP kadei ka Party jong ki Khasi, kajuh ruh ïa ka NPP lah ban ong shane ba kadei ka Party jong ki Garo.
Haba kren ha ka jing-ïalang ban pan jingkyrshan ïa u MLA Mawthadraishan, u Bah HB Nongsiej, uban long ruh u kyrtong ka Party na Mawthadraishan ha ka elekshon MLA 2023, u Bah Jambor, u la ong ba kiwei pat ki Seng Riewlum kum ka HSPDP kiba bun ki ong ba kadei ka Party u Maieit Hoping, nangta ka NPP ki ong ba kadei ka Party u Purno. Hynrei ka UDP kam ju ong ba kadei ka Party u Bah Bring ne u Bah EK Mawlong ne ka Party u Dr. Donkupar ne Party Bah Metbah, namar ba ka UDP kadei ka Party jong u paidbah bad nongkyrshan jong ka Seng.
Haba pynpaw ba ka Party UDP ka la nang khlaiñ katba nang mih ki sngi, u MDC Mawthadraishan, u la ong ba kumba long mynta dei kane ka Party napdeng ki Seng Riewlum kaba lah ban ïalam ïa ka sorkar ha ka jylla bad kaba lah ban poi sha ka thong ruh haduh ban da ïalam ïa ka sorkar syndon. “Hato ngim kwah ban ïalam noh ïa ka sorkar jylla da ka Seng lajong?”, ula ong.
Ha ka jingtreikam jong ka u kum u MDC bad hapoh ka jingïalam u Bah Titos Chyne, kum u CEM, uba long ruh u Vice President ka UDP, ka Executive Committee jong ka KHADC,ka la thaw ïa ka aiñ na ka bynta ban buh beit ryntih ïa ka rukom rejistar ïa ka khyndew ka shyiap ne ka jaka ka puta ha kaba ki paidbah kin suk bad ki lad ban rejistar lyngba ki Nongïalam Shnong bad ki Nongïalam Hima.
U Bah Brol haba kren ha kane ka jingïalang, u la pynpaw ka jingsngewkmen ba ki paidbah nongthep vote ha Tiehnongbah ki dang ïabun wat hapdeng ka jingmih noh ki nongïalam kiba hakhmat na ka Party. Halor ka jingmih noh kine ki nongïalam, u Bah Brol u la ong ba um khang ïa kito kiba kwah ban mih haba ki sngew kiba la kham ïohnong shawei ne ki la khamlah ka jingïoh na kiwei pat ki kyrtong. Hynrei u la pynkynmaw ba na Tiehnongbah ha ka elekshon 2013, na Tiehnongbah, u la ïoh tang 154 vote katba ka Kong Irin Lyngdoh ka ïoh haduh 400 tam, pynban u la jop ïa kane ka elekshon. Nangta u ong ha ka snem 2018, naduh Tiehnongbah, Nonglait, Mawkyllei, Parïong ter ter haduh Nongkasen, ka Party HSPDP ka la tam 100 tam ïa ka UDP, hynrei ka Party UDP ka la jop ïa ka elekshon MLA. Mynta lei lei u la ong ba ka UDP kan tam kput ha man la ki jaka, namar ba ki paidbah ki la ïohi bad ki la ïoh mad ïa ka jingtreikam jong u kum u nongmihkhmat ha kine ki shiphew snem, ïa kaba u la ong ba um da donkam ban da put turoi, hynrei ki paidbah ki la tip hi aiu u la leh ha kine ki shiphew snem.