Shillong, Nohprah 28: Ka Trinamool Congress, Meghalaya,mynta ka sngi, kala sei syndon da u Mawkordor ryngkat imat ban pynkhyrnai ïa ka Mawphlang Constituency.
Ha ka jingïalang kaba la long ha Mawngap, la pynbna ba u Bah Mawkordor Rynjah, un long u kyrtong jong ka Party ha ka elekshon MLA 2023 ban long u nongmih pli ha ka jaka u Bah Eugeneson Lyngdoh, uba la rai ban nym bteng shuh ïa kane ka kam tang hadien shi snem tam.
Ha kane ka jingïalang la pynshngaiñ da ka jingïadon lang u Bah George B. Lyndoh, MLA Umroi uba long u Vice President jong ka Party, nangta uwei pat u Vice President, u Bah James Lyngdoh, u Bah Fernandez Lyngdoh, President ka Youth Wing, Kong Kathleen Marbañiang, Vice President Women’s Wing, i Elgiva Rynjah, Secretary Women’s Wing bad kiwei kiwei.
U Bah Mawkordor, haba kren ha kane ka jingïalang, u la ong ba um banse ban mih shakhmat ban ïakit lem ïa ka jingkit ba khia na ka bynta ki paidbah jong ka Constituency. U la ong ba ha ka jingïaid jong u ha kiba bun ki Shnong ha Mawphlang Constituency, u la ïohi ïa ka jingsahdien ha kiba bun ki liang. “Wat lada ka jylla Meghalaya ka la dap sanphew snem bad ka la rakhe ruh ïa ka Jubili Ksiar, pynban ha Mawphlang Constituency ki dang don shibun ki kam kiba dei ban leh na ka bynta ki paidbah”, ula ong, da kaba ban ba ka jingkyntiew ïa ka ïoh ka kot bad bun kiwei kiwei pat.
U la ong ruh ba um ju poi pyrkhat ba u hap ban mih shakhmat sha kane ka rynsan saiñpyrthei, hynrei haba u ïohi ïa ka jingdonkam u paidbah, u mih shakhmat ban ïatreilang na ka bynta ka roi ka par jong ka dong bad ka thaiñ.
Haba batai balei ba u la jied ïa ka Seng TMC, u Bah Mawkordor, u la ong ba ka daw kadei namar ba u ïohi ba dei tang kane ka Party kaba ïeng na ka bynta u duk u suk,ki nongbylla, ki nongrep bad kadei ka Party ruh kaba ïeng ban ïada na ka bynta ki rit paid jong ka ri India.
U la ong ruh ba ka nongïalam jong ka Partym ka Mamata Banerjee, kadei kawei na ki riewkynthei ba radbah jong ka ri India bad ka la leh ruh shibun ki kam pynroi ha West Bengal.
U Bah Mawkordor udei uba treikam lajong da kaba pynïaid ïa ka dewbilat. Udei u Khasi ba nyngkong eh ban knieh ïa ka kam pynïaid ïew ba ju bat da ki Marwari bad u la ïoh pdiang ruh bun tylli ki Khusnam na ka bynta kane.
La ïoh ruh ïa ka jingkren na u Bah Precious Sun, uba long uwei na ki nongtrei ba radbah ka Party ha Mawphlang, uba la ong ba ki paidbah kidei ban kyrshan ïa ka TMC, namar dei tang kane ka Party kaba lah ban ïakhun pyrshah ïa ki Polisi jong ka BJP, kum ka Uniform Civil Code bad kiwei kiwei de ki jingtreikam ban thombor ïa ki rit paid bad ïa ki niam rit paid ha ri India. U la ong ruh ba dei ka TMC kaba ki MP jong ka, ki la mih ban dawa ban pynrung ïa ka ktien Khasi ha ka Riti Synshar jong ka ri India. “Ki Party kiba don ha ka sorkar MDA ki ju kyntait ba ka BJP ka thombor ?ïa ki rit paid, hynrei ki jingjia ha kine ki sngi baladep, ki sakhi ïa ka jingthombor ka BJP ïa ki ritpaid”, u la ong.
U la ther ruh ïa ka Seng NPP bad UDP kiba la long ki mawjynthut ïa kiba bun ki kam pynroi ha ka jylla, naduh ka jingduh tulop ki nonghikai, ka jingshah siat ïap u Bah Cherish Thangkhiew bad ka jingbym ïoh kam ïoh jam ki Samla. “Ngi la sei syndon da u mawkordor, hato phin dang kyntait seh kat ïa u mawkordor?”, u la ong.
