La shu kynnoh, ong u Conrad ba thong ka NPP da ki klur ïa u Bah Banteidor

Shillong, Nohprah 28 : U National President ka NPP ba dei ruh u Myntri Rangbah ka jylla, Conrad K Sangma ha ka sngi Palei ba la dep u la pynpaw ba um don jingtip satia halor ka jingkam da u wei na ki MLA ba donlang ha ka sorkar MDA ba ka NPP Ka thong da ki klur ïa u ba un leit pynïasoh noh sha ka NPP.
Kane ka jingkren jong u Conrad kadei hadien ba la mih ka jingkynnoh na u Bah Banteidor Lyngdoh, MLA na Mawkynrew bad Myntri ha ka sorkar jylla ba ka NPP ka la thong haduh 5 klur tyngka ïa u ban wan pyn ïasoh sha ka party jong ki.
“Kane kam dei satia kaba shisha bad nga ruh ngam tip eiei ïa kine baroh,” u la ong.
Ha kajuh ka ka por u la ong ruh ba dei lyngba ka jingtrei bha jong ka NPP bad ka jinglah ban wanrah shibun ki kam pynroi ba mynta bun bha ki nongïalam la ka long naduh ki MLA ne MDC kiba kwah ban ïatreilang bad wan ïakhun na ka NPP ha ka elekshon ban wan.
Ha kawei pat ka liang u Myntri Rangbah haba pynshai pat halor ka jingkynnoh da ka UDP ba ka NPP ka shim kabu ïa ka skim FOCUS, u Myntri Rangbah u la ong ba kane kadei ka skim kaba la ïaid mynta la arsnem bad kam dei shuh kaba dang thymmai.
“Hynrei lada don pat ki briew kiba kwah ban pynlong Ishu elekshon ïa ka ngim lah satia ban leh eiei ïa ka tangba ha kine ki arsnem ba kane ka skim ka treikam ki la don shibun kiba ïoh jingmyntoi na ka,” bynrap shuh shuh u Conrad.
Ïa kum kine ki jingkynthoh jong ki dei tang na ki hi ba lah ban pynshai bha. Hynrei ka jingwan jong ki nongïalam na ki party bapher bapher ban wan ïakhun noh na ka NPP kadei namar ki ïohi ba dei tang ha kane ka party ba ka don ka jingkyrmen,” bynrap shuh shuh u Conrad.