Plie u Conrad Sangma ïa ka ‘Cultural & Textile Exhibitions’ ha CPGSAS Umïam

Nongpoh, K’lyngkot, 28: Ka College of Community Science, Central Agricultural University (Imphal), Tura, Meghalaya, ha ryngkat ka jingïatreilang bad ka ICAR-NINFET Kolkata, ICAR-CICR Nagpur, Deendayal Research Institute, bad ICAR-CRIJAF Barrackpore, ka la pynlong ïa ka ‘Symposium National’ ba lai sngi halor ka phang “Threads of Heritage: Exploring Traditional Textiles and Natural Fibres” kaba la sdang naduh ka 27 tarik bad yn pynkut ha ka 29 tarik Kyllalyngkot, 2025, ha College of Post-Graduate Studies in Agricultural Sciences, Umïam, Ri-Bhoi District.
Ha kane ka jingïalang ba la pynlong mynta ka sngi, u Conrad Sangma, Myntri Rangbah ka jylla Meghalaya, u la shim bynta kum u Kongsan, bad kiwei pat kiba la sakhi lang ki kynthup ïa ka Archana Chitnis, ka MLA na Madhya Pradesh, bad u Atul Jain, General Secretary ka Deendayal Research Institute kum ki symbut kongsan, ha ka jingïadonlang ka Dr. Jyoti Vastrad, Dean ka College of Community Science, CAU, Tura, u Dr. A. Mishra, Vice Chancellor ka CAU, Imphal, ryngkat kiwei kiwei ki riewshemphang bad ki nongshna kti (Artisans) na kylleng ki jylla ka ri.
U Conrad Sangma ha kane ka sngi kum u kongsan u la plie paidbah ïa ka Cultural & Textile Exhibitions, ban pyni sha ka pyrthei halor ka jingriewspah ha ki kam thain jain tynrai bad ka jingpynti ïa ki jain bad ki ksai tynrai ha kaba pyndonkam ha ka thir ka thaiñ tynrai ha ki jylla shatei lam mihngi ka ri India.
Ha kane ka sngi, la pynlait paidbah ruh ïa ka Souvenir bad ruh ïa ki kot, kiba ïa dei bynta ba kane ka jingïalangbah ba la tip kum ka Symposium National kaba lai sngi kynthih.
Haba kren ha kane ka sngi kum u kongsan, u Myntri rangbah ka jylla u Conrad K. Sangma u la pympaw ïa ka mynsiem jong ka jingkmen bad ai khublei ïa ka College of Community Science, Central Agricultural University (Imphal), Tura, Meghalaya kaba la pynlong ïa kane ka Symposium National bad u la pynpaw ruh ka jingpynlong kum kane ka prorkam ka long ban ai lad ïa ki nongthaiñ jaiñ ne ki nongshna kti ba kin pynpaw ïa la ki sap ki phong ba ki don ha ki kam kiba ki trei katkum ka sap tynrai.
“Kane ka jingpynlong ïa kane ka Symposium National ka long ruh shi bynta ban ngin lah ban pynriewspah ïa ki kam tynrai kaba ngi trei bad ki nongthaiñ ne ki nongshna kti ym tang ba ki ïoh jingmyntoi ban pynim jakpoh ïa ka ing ka sem bad ka long ruh shi bynta ban pynneh ïa la ka kam tynrai ne ka riti ka dustur ka ban neh sah ha ka pateng ban sa wan bad lyngba ki riti ki dustur kiba ngi pynneh pynsah ka pyrthei kan ithuh ruh ïangi ïa kata ka jinglong tynrai ba kyrpang jongngi” ong u Myntri rangbah ka jylla u Conrad K. Sangma.
U la ïaroh ruh ïa ka College of Community Science, Central Agricultural University (Imphal), Tura kaba la pynlong kane ka prokram kyrpang bad kaba la seisoh shisha bad ha kajuh ka por u la ban khia ruh ba kane ka long shi bynta ban pynneh pynsah ïa ka jonglong tyrnai ka jaid byrniew lyngba kine ki kam ki jam tynrai kiba ngi trei ngi ktah, u la bynrap.