Bthah ka tnad transport ïa ki paidbah ban pynbiang ki kot kali bad pyndait da ki HSRP number plate

Nongpoh, Jylliew 12: Hadien ka jinglap ba bun naki kali, khamtam ki kali heh kiba ïaid haki thaiñ khappud ka jylla, ki ïaid khlem ki kot ki sla bad khlem da pyndait ïaki High Security Registration Plates haka bynta ba shadien bad shakhmat jong ka kali, ka tnad transport ka sorkar jylla kala pynmih daka hukum sha ki paidbah ba ki dei ban bud ryntih ïaki kyndon aiñ namar kane ka dei ka jingpynkheiñ ïaka hukum jong ka iingbishar Supreme Court bad Rule 50 jong ka Central Motor Vehicles Rules 1989 kaba bthah ïaki paidbah ba dei ban pyndait da ki HSRP number plate shadien bad shakhmat kynthup ruh ki ar shaka.
Shuh shuh la bthah ruh ba baroh ki kali paidbah kumjuh ruh ki kali kamai ki dei ban don bad ban rah ïa ki kot ki sla kiba biang bad ba donkam naduh ki certificate of fitness, ka registration certificate, insurance certificate, puc certificate, driving license jong u nongñiah bad kiwei kiwei pat ki kot ki sla kiba la bthah katkum ka Motor Vehicles Act, 1988.
Ha kaba ïadei bad katei ka hukum jong ka tnad Transport naka liang u Deputy Commissioner ka Ri-Bhoi u la kyntu ïa baroh ki trai kali bad ki nongñiah kali ban bud ryntih ïa kine ki kyndon aiñ namar ka tnad Transport kan sa pynlong ïa ki jingkhynra (enforcement drives) ha kylleng ka jylla, khamtam ha ki thaiñ khappud, ban peitngor ïa ka jingbud ryntih ïa kine ki kyndon.
Kino kino kiba pynkheiñ ïaki kyndon aiñ kin ngat ha ki jingpynshitom katkum ka Motor Vehicles Act, 1988, kynthup ïa ka jingkurup ïa ka kali, ka kuna kaba heh, bad wat ban shah set along, kumta la kyrpad ïaki paidbah ban ai ka jingïatreilang naka bynta ka jingshngaiñ haka leit ka wan.