Iwei ba mynsaw jur bad lait thaw 2 ngut ba hap ka slep katba dang trei ha Nongpoh

Nongpoh, Jylliew 13: Uwei u samla naka shnong Umpathaw, Ri-Bhoi District u la khlad noh syndon na kane ka sla pyrthei katba uwei pat u la mynsaw jur hadien ba ka slep jong kawei ka building kaba don hapdeng sor Nongpoh kaba dang shna pynpra ka la hap kynsan katba ki dang trei mynta ka step sngi Saitjaiñ.
Katkum ka khubor bala ioh lum la ong ba kane ka jingjia ka la jia ha ka por kumba 10 baje mynstep ha kawei ka building kaba dei jong u Ma Ngaitlang Dhar, kaba don hapdeng ka sor Nongpoh bad kaba dang don hapdeng ka jingmaramot ban shna pynbha hynrei ha ka por ba ki saw ngut ki samla ki dang trei kynsan kynsan ka slep jong ka mala ba kham haneng ka la khyllem bad ban syndon ïa 2 ngut ki samla.
Ha katei ka jingjia, uwei u samla, uba la tip kyrteng kum u Jelin Mangu, 20 snem ka rta, u la khlad noh katba uwei pat u samla bala tip kyrteng kum u Solar Lymphuid 19 snem ka rta, u la mynsaw jur bad la pynkit mar mar ïa u sha Civil Hospital Nongpoh.
Katba ki ar ngut kiba lait thaw na ka jingjia khlem mynsaw ki kynthup ïa u Nalor Myrsing, 19 snem ka rta, bad u Turbor Damlong, 22 snem ka rta. Baroh saw ngut ki dei kiba na ka shnong Umpathaw, Ri-Bhoi District.
Hadien ba ki paidbah ki la ioh jingtip halor katei ka jingjia, ki la mareh sted sha katei ka jaka ban leit ai jingïarap. Nyngkong eh la lah ban sei ïa uba mynsaw bad pynkit noh sha hospital, katba hadien katto katne por la lah pat ban sei ïa utei u samla uba la sahkut hapoh katei ka building bad uba la duh noh ïa la ka jingim.
Na ka liang ki pulit, bad ka kynhun jong ka Fire and Emergency Services ki la poi mar mar sha ka jaka ban pynlong ka jingtohkit ruh bad ïarap bad la pynkit noh ïa ka met jong uba la khlad sha Civil Hospital Nongpoh ban pyndep ïa ki jingdonkam katkum ka aiñ.