Lajan dep artad ka jingbishar bniah ïa ka jingshakri ki 108 bad dang sahkut ban ithuh pura ïa ki nongtrei

Shillong, Jylliew 13 : Ka Sorkar Meghalaya ka la jan pyndep artadïa ka jingbishar bniah halor ka jingshakri jong ki kali kit nongpang ha ka jylla ba ju tip kum ka 108 emergency ambulance services. Hynrei ha kajuh ka por pat haba ïadei bad ka ishu ban ithuh noh ïa ki nongtrei kum ki nongtrei ba pura, ka sorkar ka la ong ba kane ka kam ka dang sahteng ïa mynta hi.
Katkum ka jingïathuh da u Myntri ka tnad ka Koit ka Khiah ka Jylla, Bah Wailad Shylla u la ong ba ka jingwad bniah kaba la hukum da ka sorkar ban peit ïa ka rukom treikam jong ki ambulance 108 bad kumjuh ïa ka jingmyntoi jong ki nongtrei, ka la poi sha ka bynta kaba khatduh.
“Ngi la jan poi artad sha kaba kut. Kumba nga la kdew mynshwa, ngi la phah ban bishar bniah khnang ban pynthikna ba ngin ïada ïa ka jingmyntoi jong ki nongtrei katba ngi dang wad ruh ïa ka rukom treikam kaba lah ban ïaid beit,” ong u Myntri.
Hadien ba la ïoh ïa ka kaiphod, ka sorkar kan shong ïakren bad ka tnad ka Koit ka Khiah lem bad ki nongtrei ka 108 ban shim ïa ka rai kaba bud.
“Shen ngin sa pynlong ïa ka jingïalang bad ka tnad ryngkat bad ki nongtrei ka 108 ban shim ïa ka rai kaba dei,” u la ong.
U Myntri u la ïathuh ba ki nongtrei 108 la bunsien ki la phah ïa ki jingthoh jingkyrpad (memorandum) ban pynskhem ne ithuh pura noh ïa ka kam jong ki. Katkum ka jingïathuh jong u, ka sorkar ka la lah ban pynurlong ïa kiba bun na ki jingdawa jong ki, hynrei ka mat ba dei bad ka jingdawa ban pynskhem kam ka dang sahteng.
“Ngi la ïoh pdiang ïa ki memorandum na ki por sha ki por. Kumba 50 haduh 60 persen na ki jingeh jong ki la dep ban pynbeit da ka sorkar, hynrei ka jingpynskhem kam ka dang sah. Dei kane ka mat kaba ym pat lah ban shim rai,” u la ong.
U Myntri u la ong ba ka sorkar ka dang wad ïa ka lad kaba lah ban ïarap ïa ki nongtrei khlem da pynkit jingeh palat ïa ka pla tyngka jong ka jylla. “Ngi dang pyrshang ban wad ïa ka lynti kaba ym pynkhia ïa ka pla tyngka ka jylla bad ha kajuh ka por ban ïada ïa ka jingmyntoi jong ki nongtrei,” u la bynrap.
“Ka jingshakri ka dang ïaid bad ki paidbah ki dang ïoh ïa ka jingïarap. Hynrei khlem da don ka rai kaba khatduh, ym pat lah ban tip shai kumno kan long hadien. Dei na kata ka daw ba ka sorkar ka dang sangeh shuwa ban pynheh ïa ka jingshakri,” u la ong.
Watla katta, u Myntri u la pynthikna ba ka jingshakri ha ki lad ai jingïarap kyrkieh kam pat shah ktah jur.
“Don katto katne ka jingktah, hynrei kam da jur than. Haduh mynta, ki nongtrei ki dang trei bad ka jingshakri ka dang poi sha ki paidbah,” u la ong.