Tang shu ailad ka bneng yn ïaid noh shaid shaid ka jingpynheh ïa ka Shillong Airport: SMR

Shillong, Jylliew 14 : U Symbud Myntri Rangbah ka jylla uba khmih ïa ka tnad Transport, u Bah Sniawbhalang Dhar, u la ong ba ïa ka kam ban pynheh shuh ïa Shillong Airport la dep ban ai bynta sha ka kompani hynrei ka jingsdang ïa ka kam la khmih lynti ba kan sa sdang noh shen namar ka jingther jong u lapbah ha kine ki khyndiat sngi ba la dep.
Haba kren bad ki lad pathai khubor, u Symbud Myntri Rangbah u la ong, “La dep ban ai bynta ïa ka kam, hynrei ka jingtrei kam pat sdang. Kata ka long ka jingtip kaba khatduh haduh mynta. Ha kane ka por ki la dei ban sdang namar la dep ban ai ïa ka work order. Lehse namar u slap ba jur, ka kam ka la shah pynslem. Tang shu duna u slap, ka jingtrei kan sdang noh.”
Halor ki jingsngewkhia ba don ki jingpynslem ha ki rukom treikam, u Symbud Myntri Rangbah u la batai ba ka jingkhot khot tender ka dei tang hadien ba la ïoh lut ïa baroh ki jingbit ba donkam kiba dei ban ïoh.
“Ngi la ïoh ïa ka jingbit (clearance), dei na kata ka daw ba ngi la khot tender. Ngi la ïoh ïa ka jingbit ban trei ha ki bynta jong ka jaka ka tnad Defence. Ngin ym lah ban khot tender lada ngim pat ïoh ïa ka jingmynjur,” u la ong.
U Symbud Myntri Rangbah u la ong ruh ba ka projek kan ïaid shakhmat tang shu bha ka suiñbneng bad duna ka jinghap slap.