Sah sa khyndiat ban pyndep ïa ka Khyndailad Shopping Mall bad ïaid stet ki kam pynroi ha New Shillong

Shillong, Jylliew 11 : U Symbud Myntri Rangbah ka jylla uba khmih ïa ka tnad Urban Affairs, u Sniawbhalang Dhar, u la ong ba ka projek Khyndailad Shopping Mall ka la jan dep artad bad mynta ka sorkar shen kan sa khot noh ïa ka Expression of Interest (EOI) tang shu la ïoh ïa ka kaiphod ba la pyndep lut ïa ka kam.
“Haduh mynta ngim pat dep dep pura ïa ka. Tang shu la aiti ïa ka kaiphod ba la pynde lut ngin sa khot noh ïa ka Expression of Interest,” ong u Symbud Myntri Rangbah.
Ha kajuh u la kren ruh halor ka projek Polo Mall kaba dang sahteng, da kaba ong ba wat hadien ba ka sorkar ka la pynmih bun sien ïa ki jingpynbna paidbah, hynrei ym shym la don kiba wan shakhmat ban shimti pynïaid ïa kane ka projek.
“Ngi la pynmih jingpynbna paidbah arsien lai sien hynrei ym shym la don mano mano kiba wan shakhmat. Kumta ngin hap ban dang ïa jingïakren biang bad ngin hap ban pynduna khyndiat ïa ki kyndon. Kata ka long haduh mynta, hynrei ngin dang hap peit shuh shuh,” u la ong.
Nangta haba ïathuh pat ïa ka jingïaid stet ka projek kam pynroi ha New Shillong Township, u Symbud Myntri Rangbah u la ong ba ki sngewkmen haduh katta katta ba kum ka sorkar kin ïohi ba ki projek bapher bapher hapoh ki tnad sorkar ki la ïaid stet bha.
“Ka kam ka dang ïaid bha shakhmat, ha ka rukom kaba biang bha ha baroh ki projek. Ki don ki projek jong ka Urban Affairs, Tourism bad kiwei kiwei ruh. Baroh ki projek ha New Shillong Township bad ki thaiñ ba marjan ki dang ïaid shaphrang,” u la bynrap.