Buh Mawnongrim u Marcuise halor ka umbam umdih ha Lumshngain kaba kot 6.72 klur tyngka

Shillong, Jylliew 13: U Marcuise N Marak uba dei u Myntri sorkar ba peit ïa ka tnad Public Health Engineering (PHE) mynta ka sngi ka 13 tarik u Jylliew u la plie ïa u mawbuh nongrim na ka bynta ban sam umbam umduh ha Lumshngain kaba hap hapoh ka jingpeit ka Dorbar Shnong Rynjah, Shillong.
Ïa u Marcuise N Marak uba long kum u kongsan la synran lang da u MLA ka thain u Bah Chrales Pyngrope kum u symbud kongsan ha ka jingdon lang u MLA bad MDC barim ka Mawryngkneng u Bah Pyniaid Sing Syiem u Bah Jemino Mawthoh u MLA barim ka Nongthymmai.
Nalor kine ki kynrem ki lyndan la don lang ruh ki heh ophisar na ka tnad PHE, ki nongkitkam shnong hapoh ka jingialam u Bah Eddie V War, ki seng longkmie, ki sport club bad kumjuh ruh ki seng samla shnong.
Na ka liang jong ka shnong kila pyntip ba ka dong Lumshngain kadei kawei ka dong kaba la sdang ban kyrduh um bha, kumta na ka liang jong ka shnong lem bad ka seng kynthei man ka por ki ju leit pynsngew ia kane ka kam sha u MLA bad mynta ka sngi kala wan ban urlong.
Ka jinglut jingsep na ka bynta kane ka Augmentation of Water Supply Scheme ha Dong Lumshngain, Rynjah ka long haduh T. 6.72 klur.
Haba kren ha ka jingialang u Marcuise N Marak u la pynpaw ba u dap da ka jingkmen ba khraw ban don bynta lang bad ka shnong ban buh ia u maw nongrim jong kane ka project kaba la kot haduh 6 klur tam bad ïa kane dang shu dep bam mang pisa ha kine ki khyndiat por.
“Ka um kadei ka jingim bad na ka liang jong ka sorkar India kala pyllait paidbah ha ryngkat bad ka sorkar jylla ïa ka skhim Jal Jivan Mission (JJM) ban pynioh um ia baroh ki paidbah nong shong shnong jong ka ri ia kaba la sdang ha u snem 2019” ong u Marcuise.
Hapoh ka jylla Meghalaya u Marcuise u la ong, “Ka sorkar Meghalaya da ka jingkyrshan jong ka sorkar kmie kala pyllait paidbah ïa ka skhim JJM ha u snem 2019 bad ha une u snem ki long ïing kiba poi um ha ïing ki long tang 4550 tylli ki long ïing ha baroh kawei ka jylla” u la ong.
Mynta ka jylla kala kynjoh sha ki 5 lak tam ki long ïing kiba la poi um ha thliew ïing bad haba ïa khein ïa ka percentage kala kot haduh 84% bad kane ka pyni shai kdar ia ka jingshim khia jong ka sorkar jylla hapoh ka jingialam u Conrad K Sangma.