Kyrpad u Bah KL Pariat ban pynlong tang da ki Common Platform
Ban ym thud ki khynnah ba pynkhreh eksamin

Jowai, K’Lyngkot, 28: U Bah Khroo L Pariat uba la mih ban aireng kum u kyrtong Independent na Jowai North Constituency ha ka elekshon MDC sha ka Jaiñtia Hills Autonomous District Council (JHADC) u la kyntu sha baroh ki Dorbar Shnong ba kin shimkhia ban pynbeit bha ïa ka rukom ïalap elekshon khnang ban ym ktah ïa ki khynnah kiba ïakhun ïa ka eksamin SSLC bad HSSLC ka ban sdang naduh ka 10 tarik, Rymphang, 2025.
U la ai jingmut ïa ki Dorbar Shnong ban shu pynlong beit da ki Common Platform ba shi sngi ha manla ki Shnong khnang ba ki kyrtong kin ïohlad ban pynsngew ïa ki nongrim ki jong ki sha ki paidbah nongthep vote.
U la kyntu ïa ki dorbar shnong ba kim dei ban shah ïa ki briew bad ïa ki kali na kiwei pat ki shnong ban rung shapoh ki shnong ki thaw lada pynlong tang ïa ka Common Platform.
Ban lait na ki jinghuri hura ha ki shnong ki thaw ula dawa ban pynsangeh shi syndon ïa ka jingïabam doh miet, ki jingleit bam khana, ka jingtem ïa ki sur bad ka jingshad elekshon ha ka por mynmiet hapoh ki shnong ki thaw.
Ula ai jingmut sha ki Dorbar Shnong lada don kino kino kiba pynkheiñ ïa ki jingmana shnong ki dei ban pynshitom katkum ki kyndon aiñ jong ka shnong.
U Bah Pariat u la kyntu lang ïa baroh kiba don ïa ka hok ban thep vote ba kin pyndep hok ïa la kamram da kaba leit sha ki jaka thep vote bad ban jied ïa u ne ka nongmihkhmat kaba ki la ibit.