Buh kyndon ka shnong Panaliar ha ka jingïalap elekshon hapoh u pud ka shnong

0

Jowai, K’Lyngkot 28: Ka shnong Panaliar Jowai ha ka jingïalang kaba dang shudep shong, ka la pyrkhat sani bha, ha kaba ïadei bad ka Election MDC sha JHADC ka ban sa long shen.
Ka shnong kam shem la pynduh ne khang ïa ka jinglaitluid jong kino kino ki Candidate kiban ïakhun ha ka election, hynrei ka la buh ïa ki kyndon, na ka bynta ka bha ka miat, ka shongsuk shongsaiñ, ka khuid ka jngiar bad ruh ban pynïoh lad ïa ki nongshong shnong ban ïadon bynta ha ki jingïalang kiba ki candidate kin sa pynlong. Kumta, kumba la ju mlien naduh ki election kiba lah dep ha ki snem mynshwa, ha kane ka kynti ruh ka shnong ka la buh ïa kijuh hi ki kyndon.
Ki kyndon kiba la buh ki kynthup ka jingkhang pyrshah ïa kino kino kiba mih ba rung shapoh ka shnong Panaliar ban leh khlem akor ïa kino kino ki jingdon jingem sharud lynti syngkien, ne pynjakhlia da kaba bret pathar ïa ki jaboh jabaiñ. Lakhang pyrshah ïa kino kino kiba ïaid ba ïeng ha kapor miet synñia bad ruh ban sam pisa sha ki nongshong shnong. Tang shisien uwei ne kawei ki Candidate ki lah ban pynlong jingïalang hapoh Yungwalieh ka shnong. Ym shah ïa kino kino kiba pynlong jingïalang ïalap election ban leh decoration ïa ka Yungwalieh ne ka Stage jong ka Yungwalieh, ha kajuh kapor lakhang pyrshah ban ai ne sam Sha hapoh Yungwalieh. La shah tang 10 (shiphew) kynthuplang ïa u Candidate ban rung shapoh ka shnong Panaliar ban pynlong jingïalang. Lah ban pyndonkam tang 2 (ar) tylli ki kali rit ban wan sha ka jingïalang. Ka shnong kan sa ai da ki badge ïa kiba dei kam. Lashah tang uwei u nongkren na ka liang u Candidate u ban kren ha shuwa jong u, ha ka jingïalang bad ymdei ban kren tohmet, kynthoh ne kren beiñ ïa kiwei.
Kino kino ki Party Unit kiba kwah ban pynkup burom ïa la u jong u Candidate, ki dei ban panbor shuwa na u Waheh Chnong shisngi shwa ka tarik jong ka jingïalang, lym kumta, ymshah ia ki ban leh ïa kane. Ka shnong kan ymshah ia ki riew shimet ban leh ïa kane. Lakhang pyrshah ïa kino kino ki Candidates kiba pynlong jingïalang sha ki shnong ba shajan ka shnong Panaliar ban phah pynieng ïa ki Kali jong ki, shapoh u pud u sam ka shnong, ha kajuh kapor ki nongkyrshan jong ki, kim dei ban mih ban rung shapoh ka shnong Panaliar.
Ka shnong ka kyntu ïa baroh ki Candidate ban ïasnohktilang bad ki aiñ shnong, na ka bynta ka jingbha ha baroh ki liang. La mana ruh ba, lada don kiba pynkheiñ ïa ki kyndon, ka shnong ka lah ban pynduh ïa ki ban pynlong jingïalang ne ban pynsangeh ïa ka jingialang lada dei ha kapor ba lah sdang. Ka shnong ka kitbok kitrwiang ruh ïa baroh ki Candidate ba kin ïoh ïa kaei kaba ki la thmu ha ka jingim ka jong ki. Ha ka jingïaleh, ym lah ban jop baroh, hynrei baroh ki candidate ki dei ki jong ka shnong lada ki jop ne ki rem ruh.
Ka shnong ka donkam ïa ka jingïatreilang jong baroh, khnang ba kan lah ban leh ïa kino kino ki kam kiba ka la thmu, na ka bynta ka bha ka miat ha ka imlang sahlang.

Leave A Reply

Your email address will not be published.