Ai khublei u Rangbah Shnong ba shah khot rakhe Republic Day ha Delhi

Nongpoh, K’lyngkot 28: U Rangbah Shnong ka Shnong Mawpun Kshaid bad uba dei ruh u President ka Confederation of Ri Bhoi People (CoRP), u Bah Bandari Ryntathiang, mynta ka sngi u la ai khublei kyrpang ïa ka sorkar jylla, bad ruh ka sorkar India halor ka jingshah khot ban don bynta ha ka jingrakhe ïa ka Republic Day ha Nongbah Delhi ba katei ka shnong ka la ïoh pdiang ruh ïa ka khusnam na ka sorkar India.
Na ka liang u Bah Bandari Ryntathiang, u la ai khublei khrpang ruh ym tang ba kum u rangbah shnong u la shah khot sha ka jingrakhe ha ka Republic Day ha Nongbah Delhi, hynrei u la ai khublei kyrpang ruh halor ka jingïoh pdiang ïa ka khusnam na ka sorkar India lyngba ka Ministry ka Jal Shakti jong ka sorkar India ba la sam da u Under Secretary ka Ministry ka Jal Shakti, halor ka jingpyntreikam hok ïa ka skhim Jal Jeevan Mission (JJM) ha katei ka shnong Mawpun Kshaid.
U la shim ruh kabu ban ai khublei kyrpang ïa u Blei Nongbuh Nongthaw, ba dei lyngba ka jingïalam lynti jong u, ba ka Shnong ka la ïoh pdiang ïa katei ka khusnam na ka sorkar India. Ha kajuh ka por u ai khublei ruh ïa ka tnad PHE na Ri Bhoi, ka village Water Sanitation Committee, ki paidbah nongshong shnong, namar dei lyngba ka jingïatrei lang ka shnong ka la ïoh ïa ka jingithuh kum ka shnong kaba pyntreikam hok ïa katei ka skhim JJM hapoh ka shnong.
Ha kawei ka bynta, u la ai khublei kyrpang ruh ïa ka sorkar jylla bad ki tnad treikam sorkar lyngba ka tnad PHE bad kumjuh ruh ïa ka State Institute Rural Development Nongsder, namar dei lyngba ki lad ai jinghikai ba la ïoh pdiang na katei ka shlem ai jinghikai ka sorkar, ba ka shnong ka la lah ban pyntreikam hok ïa ka skhim JJM haduh ba la ïoh pdaing ïa ka khusnam na ka sorkar India, u la bynrap.