K a jingshim rai jong ka Mawlai Town Dorbar (MTD) ban pynlong noh da ka Common Platform ïa baroh ki kyrtong kiba ïakhun ïa ka election MDC na Mawlai Constituency ka long kaba biang bad kaba dei eh namarba ka pyllait na kino kino ki kynrum kynram bad ka jingïakawang ktieh kawei ka party ïa kawei ne uwei u kyrtong ïa uwei pat.
Ka Mawlai Town Dorbar shwa ba kan shim ïa kane ka rai kam shym la ïaid lait satia wat tang ïa uwei ruh u kyrtong hynrei ka la khot lang ïa baroh ki hynriew ngut kiba ïakhun ha kyrtong kiba ïakhun ha Mawlai Constituency kata, ïa u MDC ba mynta u Bah Teiborlang Pathaw, u Bah Process T. Sawkmie, u Bah Seiborlang L. Nonglait kiba ïakhun kum ki Independent, ka kyrtong jong ka BJP Kong Daniella Nonglait bad u kyrtong ka VPP u Bah Eddieson Kharumniud ban pan jingmut bad jingmynjur lang na ki.
Ha ka jingïalang ka Mawlai Town Dorbar ka la pynpaw hakhmat jong ki hynriew ngut ki kyrtong namarba la ïoh ki jingujor na kiba bun ki kmie ki kpa jong ki khynnah skul bad na ki samla pule ba ki thut shaba palat ban pynleit jingmut ha kaba khreh kot namar ka jingpynlong ïa ki jingïalang paidbah ha kylleng ki jaka bad ki dong khamtam ha kum kane ka kynti ba ki hap ban pynkhreh ïa ka eksamin kut snem jong ki kumta ka la pan jingmut na baroh hynriew ngut ki kyrtong. Baroh ki kyrtong ki la mynjur ban pynlong da ka Common Platform ha kaba yn long beit tang kawei ka jingïalang ha kawei ka dong ne ka shnong ban kren lang ha kajuh ka por da baroh ki kyrtong na kajuh ka rynsan khnang ban ym thut ka jingpule kot ki khynnah skul bad ki samla pule.
Ha ka jingïalang u kyrtong ka VPP u Bah Eddieson Kharumnuid ruh u ïadon lang bad u la ai ka jingmynjur lang hynrei kaba lyngngoh pat ka long ha kano ka nongrim pat mynta ka VPP ka pyrshang ban ïalam bakla ïa ki paidbah ban ong ba ka Mawlai Town Dorbar ka khang ban pynlong jingïalang paidbah.
Ka Mawlai Town Dorbar kam shym la khang satia bad ka ailad ïa baroh ki kyrtong ban pynpaw ïa la ki jong ki nongrim ha ka Common Platform ne ban kren na kajuh ka rynsan. Ha ka jingshisha ki nongialam jong ka VPP kiba bun ki dei ki Professor bad ki Nonghikai ki la dei ban sngewthuh shisha bad pyrkhat na ka bynta ki khynnah skul namar ka Mawlai Town Dorbar ka leh ïa kane ym dei ba ka leh politik hynrei hadien ba ïoh jingujor na ki kmie ki kpa jongki khynnah skul bad kam shym la shim rai marwei khlem ka jingïamir jingmut shwa bad baroh ki kyrtong hynrei dei tad hadien ba la ïa mynjur lang ba la shim ia kane ka rai.
Ka jingleit ai jingujor shaduh ka tnat District Council Affairs ka Sorkar Jylla pyrshah ïa kane ka rai ba la shim da ka Mawlai Town Dorbar ka pynpaw ba ka VPP kam burom ïa ka rai jong baroh ki 17 ngut ki Rangbah Shnong kiba don hapoh ka shatri jong ka Mawlai Town Dorbar. Ym tangba kim burom ïa ka rai jongka Mawlai Town Dorbar hynrei kim pyrkhat ruh ïa ka jingud jingnam jong ki kmie ki kpa bad jong ki khynnah skul ba ka jingpynlong jingïalang paidbah ka ktah palat ïa ki khun ki kti jong ki kiba dang don hapdeng ka jingïaleh ia ka eksamin jong ka Meghalaya Board of School Education (MBoSE).
Ki nongïalam ka VPP ki la dei ban da pyrkhat sani bha shwa ban ujor sha ka District Council Affairs (DCA) namar ki dei ban kynmaw ba mynta 10 snem lynter la jan ïa ryngkat beit ka percentage jong kiba pas bad kiba pheil. Naduh u 2015 haduh u 2024 ki khynnah skul kiba pass ki long beit hapdeng ka 50 % haduh 55 % kaba la jan ïa ryngkat mar shiteng kiba pass bad mar shiteng kiba phiel.
Lah ruh ban ong ba ka Mawlai Constituency ka dei kawei na ki Constituency kaba heh tam bad kiba bun bah ki khynnah skul bad samla pule ruh ki dei na kane ka Constituency. Hooid, ban da dei ba ka Mawlai Town Dorbar ka khlem ïamir jingmut shwa bad ki kyrtong hynrei ka shim rai beit ban pynlong da ka Common Platform lane ban da dei ba ka khang tang ïa ka VPP ban ïalap election ka dei ban ujor sha DCA hynrei ka leh salonsar ïa baroh ki kyrtong jong ki seng saiñ pyrthei bapher bapher bad kiba ïakhun kum ki kyrtong shimet, kumta ka Mawlai Town Dorbar ka dei ban shim khia ïa kane ka jingshah ujor.
