Yn ïa knieh ka Shillong Lajong bad ka Mawlai ha ka final jong ka Meghalaya State League 2025
Ha ka tie-breaker liem noh ka Rymbai Shkenshynriah ha ka S/F

Shillong, K’Lyngkot 28 : Ka Shillong Lajong FC ka la ioh rung da ka said sha ka final jong ka lympung ïalehkai Meghalaya State League hadien ba ka jingïaknieh ban rung sha ka kylla kaba khatduh ne ka semi final pyrshah ïa ka Rymbai Shkenshynriah la hap ban rah shaduh ka tie-breaker.
Hadien ba ka jingïakhun ha ka kylla step ka la kut noh khlem da don ba ioh ban thep kol mano mano ruh kumta ka jingïakhun ha ka kylla miet ka la kham shongshit shuh shuh. Hangne ruh wat haduh ka minit kaba 80 ym shym la don satia ban ioh ban pynkhih jar. Dei ha ka minit kaba 84 ei ei jong ka kylla miet bad ka Shillong Lajong ka la ioh ban pynkhih jar lyngba ka free kick na u Iohborlang Lyngkhoi.
Tangba hangne ruh tang hadien khyndiat minit ka Rymbai Shkenshynriah ka la ioh ban pynphai bad pynïakhaid ïa ka jingïakhun lyngba ka penalty na u Niwan-o-Bareh ha ka minit kaba 87.
Ka jingïaknieh ban rung sha ka final hapdeng kine ki ar kynhun ka la long kaba shongshit bha khamtam hadien ba ka jingïakhun hapdeng madan ka la kut noh ha ka jingïakhaid da mar 1-1 kol. Wat hadien ba la pynjlan ïa ka por ïalehkai (extra time) baroh arliang ki la ïakhun tyngeh triang khlem da ailad ïano ïano ruh ban ioh pynkhih jar.
Dei tad ynda la kut ka por ïalehkai ba ki bor pynïaid ki la kdew ïa ka kti sha ka tie breaker. Wat ha kane ka kylla ruh ka la don ka jingkhihwin kaba jur na ki paidbah khamtam haba ka rukom thep kol bad ka jinglait ki rangïalehkai ban thep kol ka long marbud marbud. Hynrei ha kaba kut hi, ka Shillong Lajong ka la ioh ban rah ïa ka nam jop ban pyntikna ialade ba kan rung sha ka final jong ka State League hadien ba ka la jop da 4-3 kol.
Kumta da ka jingjop ha kane ka sngi, ka Shillong Lajong kan hap pat ban pynkhreh mynta ban aireng pyrshah ïa ka Mawlai Sports Club ha ka final jong ka Meghalaya State League kaban long ha ka sngi Saitjaiñ ka 01tarik Rymphang 2025 haWahïajer Multipurpose Sports Complex.