SHILLONG, Naiwieng 13: U Priyansh na Delhi bad ka Parneet Kaur na Punjab ki la khur ïa ka takma ksiar jong ki shynrang bad kynthei ha ka lympung NTPC Senior National Archery Championship ha ka sngi Thohdieng, katba ki jingïakhun ha ka compound ki la sdang ban ïaid shakhmat hynne ka sngi ha madan Parade, Umsawli.
ïa kane ka lympung la pynlong da ka Archery Association of Meghalaya hapoh ka jingpeit jong ka Archery Association of India.
Ha ka jingïakop jong ki shynrang, u Priyansh u la lah ban kamai 713 point bad tam shi point ïa u Mohit Dagar jong ka Haryana (712 point) uba la khur ïa ka takma rupa, katba u Kushal Dalal u paralok jong u na ka jylla u la khur ïa ka takma rnong da kaba kamai 710 point.
Lah ban kdew ba u Priyansh u la jop ruh ïa ka nam lahduh jong ka pyrthei ha ka kyrdan Under 21 ha ka lympung World Archery Youth Games Championship 2023 ha Limerick, katba u Dalal u dei uba la ïadon bynta ha ka kynhun ïalehkai jong ka ri ha ka Asian games ha Aichi-Nagoya.
Ha ka jingïakop jong ka Women’s compound Recurve ka Parneet ka la siat ar sien 355 na ka bynta 710 point bad tam 6 point ïa ka Madhura Dhamangaonkar na Maharashtra.
Ki takma ha ka Recurve ba la sdang naduh ka sngi plie ki la leit sha ki katto katne ki kyrteng kiba pawkhmat ha kane ka jingïalehkai kiba kynthup ïa u Dhiraj Bommadevara ka SSCB uba dei u lahduh ha ka Archery World Cup Final jong u snem 2026, u la khur ïa ka takma ksiar ha ka liang ki shynrang, katba u Parth Sushant Salunkhe na Maharashtra bad u Arjun Khara na Odisha ki la khur ïa ka takma rupa bad takma rnong.
Ha ka jingïakhun jong ki kynthei, ka Kumkum Anil Mohod na Maharashtra kaba la khur ar tylli ki takma ksiar ha ka Asian Games 2026 ka la ïoh ban khur ïa ka takma ksiar ha kane ka lympung bad ka Ankita Bhakat na Jharkhand bad ka Sangeeta na ka SSCB ki la ïoh ïa ka takma rupa bad takma rnong.
Na ka bynta ka jylla Meghalaya, u Phrangkupar Kharjahrin u la lamkhmat ïa ka kynhun ïalehkai jong ki shynrang (men’s compound contingent) da kaba kamai 691 poiñ ha ka kyrdan kaba 58.
Ha ka compound jong ki kynthei, ka Dambesa M Sangma bad ka Flory Taro ki la kamai 666 poiñ ban poi ha ka kyrdan kaba 66 bad kaba 67, katba ka Wandamaphi Kyndait ka dei ka nongïalehkai recurve archer jong ki kynthei kaba la ïoh ïa ka kyrdan ba heh tam jong ka Jylla, da kaba kamai 587 poiñ ha ka kyrdan kaba 71.
Ka kyrdan kaba saw jong u Devraj Mohaptra ha ka jingïalehkai recurve jong ki shynrang bad u Arjun Khara uba ïoh ïa ka takma rnong, ka dang long ka jingjop kaba bha tam jong ka Jylla nongpdiang haduh mynta.
