Plie pyrda u bah Pius Marweiñ ïa ka 10th Invitation Football Tournament 2026 ha ka shnong Ngunraw

Mawkyrwat, ‘Naiwieng 13: Ka Thaiñ ban Kyntiew Youth & Social Welfare Organisation, Ngunraw ka la plie pyrda ïa ka lympung ïalehkai phutbol kaba tip kum ka 10th Invitation Football Tournament 2026 ha ka shnong Ngunraw, South West Khasi Hills District ha kaba u bah Pius Marweiñ, MLA/MDC jong ka Ranikor Constituency u la long kum u kongsan.
Lah ban kdew ba kumba ju leh man la u snem ka Thaiñ ban Kyntiew Youth & Social Welfare Organisation, Ngunraw, kum shibynta ban kyntiew ïa ka jinglehkai naduh ki khynnah haduh kiba la san, ka la ju pynlong ruh ïa ki jinglehkai bapher bapher kum ka jingïalehkai kynjatbol, ka marathon, ki jingshad ki jingrwai bad kiwei kiwei bad ha kane ka snem ka seng ka la ïoh ruh ban pynlong ïa ka jinglehkai kynjatbol na ka bynta ki samla shynrang, ki kynthei bad ki rangbah kiba la kynnoh 40 snem shaneng.
Ïa kane tamasa lehkmen ki la sdang mynta u bnai Naiwieng bad kin sa pynkut pat ha ka 31 tarik u Nohprah, 2026 kum ka jingrakhe lehkmen ïa u snem thymmai.
Kum shibynta jong ka jingplie pyrda ïa kane ka tamasa lehkmen, ka TKY & SWO, Ngunraw ka la sdang da ka jingïalehkai kynjatbol ha kaba ka jingïakhun ka la long hapdeng ka Rangjadong Sports Club pyrshah ïa ka Maitshaphrang Football Club ha kaba ka Rangjadong SC ka la lah ban pynliem ïa ka Maitshaphrang FT da 2 – 1 kol.
Nalor u kongsan kiwei de kiba la don lang ki long u bah D.E. Turnia, Myntri Shnong Ngunraw, bah John Iawphniaw, President ka Thaiñ ban Kyntiew Youth & Social Welfare Organisation, Ngunraw, ki Riew rangbah bad ha ryngkat ki paidbah jong ka shnong Ngunraw baroh kawei.