Shillong, Lber 18 : U MLA barim ka Mawlai, Bah PT Sawkmie u la plie ïa ka madan basketball jong ka Stephen Memorial Secondary School kaba don ha Mawlai Mawroh, ha ka jingdon ryngkat ki nongpynïaid skul, ki nongkitkam shnong Mawlai Mawroh, ki khynnah skul bad kiwei kiwei.
Ha kane ka sngi u Bah PT Sawkmie u la pynbna ruh ba la plie ïa skul sport kaba ju pynlong shisien shi snem ka Annual School Sports Meet 2025.
Shuwa ban plie ïa ka madan bad ïa ka skul sport ka la don ka jingïakob ïalehkai March Pass da ki saw tylli ki House, ka Green, Blue, Yellow bad ka Red. Ki la don ruh ki jingïalehkai drill ba la shim bynta da ki khynnah jong kane ka skul.
Haba kren ha kane ka sngi une u MLA barim ka Mawlai u la kyntu ïa ki khynnah ba barabor ki dei ban mih shakhmat ban ïa shim bynta ha ki jingïalehkai ba ka skul ka pynlong, khnang ba kan kyntiew ïa ki ha ki liang baroh kynthup wat ha ki jingpule.
Katba na ka liang ka Headmistress jong ka skul ka la pynpaw ïa ka jingsngewnguh halor kane ka jingai jong u Bah PT Sawkmie ïa ka madan basketball lyngba ka MLA skhim kaba u la ai por ba dang long MLA. Ïa kane ka madan u nongmihkhmat barim u la plie ha ka 11 tarik u Lber, 2025.
