Buh maw nongrim u Myntri Rangbah ka jylla na ka bynta ka madan phutbol ha Anangpara

Ampati, Risaw 20: U Myntri Rangbah ka Jylla Meghalaya u Conrad K. Sangma, ha ka sngi Ba-ar jong ka 20 tarik Risaw, u la buh ïa u maw nongrim na ka bynta ka madan phutbol ‘synthetic turf’ ha Anangpara Playground ha South West Garo Hills, kaba kot ïa ka 8.57 klur.
Kane ka projek ka long shi bynta jong ka jingpyrshang ka sorkar jylla ban pynroi bad kyntiew ïa ki jingtei ïalehkai ha kylleng ki jaka nongkyndong bad ban plielad ïa la ki jong ki nongïalehkai trai ri ba kin pynroi ïa ka sap ba ki don.
Haba kren halor kane ha ka rynsan social media X (kaba la tip da ka Twitter mynshwa), u Conrad u la pynbna ba kane ka synthetic turf ba la buh thymmai ka dei kawei na ki san tylli ki jingthmu ba kongsan kiba ïadei bad ka kam ïalehkai—kiba ka mang tyngka da kheiñ kyllum lang kan kynjoh haduh 60.05 klur—ba la pyntreikam bad ïaid mynta ha South West Garo Hills.
“La buh ïa u maw nongrim na ka bynta ka Synthetic Football Ground kaba 8.57 klur tyngka ha Anangpara Playground ha South West Garo Hills,” la thoh u Conrad Sangma ha ka kyrwoh.
“Da 5 tylli ki projek kiba ïadei bad ka kam ïalehkai kiba shongdor 60.05 klur kiba la pyntreikam ne dang ïaid shakhmat hapoh ka District, ngi pynkhlaiñ ïa ki jingtei jaka ïalehkai bad ngi plielad shuh shuh na ka bynta ki samla jong ngi.”
U Myntri Rangbah ka Jylla u la bynrap ruh ba kane ka jaka kaban sa wan kan long kum ka jaka plie ïa ki sap ïalehkai phutbol na ka thaiñ kiba thrang ban ïakhun ha ki kyrdan kiba kham halor.
“Kane ka jaka kan kyrshan ïa ka jingpynroi ïa ka jingïalehkai phutbol, kan saiñdur ïa ki sap jong ka thaiñ bad kan ai ïa ka rynsan kaba paka ban ïakhun, ka ban pynkylla ïa ka sap jong ki samla sha ka jingmyntoi,” la ong u Conrad.