Shillong, Lber 18 : Ka NorthEast United FC hadien baka la ïoh ban rung sha ka thup jong ki 6 tylli ki kynhun ban ïa knieh rung sha ka semi final lane kata ka playoff, ka hap ban aireng pyrshah ïa ka Jamshedpur FC ha ka jingïakhun kaban long ha ka 29tarik mynta u bnai ha madan JN Stadium Polo, Shillong.
Lah ban kdew hangne ba ha kane ka playoff, ki kynhun kiba don ha ka kyrdan kaba lai haduh ba hynriew ki hap ban ïa knieh ban rung pat sha ka kylla kaba ar kata sha ka semi final. Katba ka kynhun ba wan ha ka kyrdan kaba nyngkong bad kaba wan ba ar kata ka Mohun Bagan bad ka FC Goa ki la ïoh ban rung suk sha ka semi final.
Katkum ki prokram ïalehkai, ka Bengaluru FC kan hap ban ïakhun pyrshah ïa ka Mumbai City FC ha ka 29tarik (knockout 1) ban knieh rung sha ka semi final, bud pat sa ka NorthEast United ha ka 30tarik (knockout 2).
Ha ka kylla ba nyngkong jong ka semi final (first leg) ka kynhun kaba jop na ka jingïakhun hapdeng ka Bengaluru bad ka Mumbai City kan hap ban ïakhun pyrshah ïa ka FC Goa ha ka 02tarik Ïaiong. Katba ka kynhun kaba jop hapdeng ka NorthEast bad Jamshedpur kan hap ban ïakhun pyrshah ïa ka Mohun Bagan Super Giant ha ka 03tarik Ïaiong.
Ha ka kylla ba ar jong ka semi final (second leg), ka jingïakhun kan long hapdeng ka FC Goa (home) pyrshah ïa ka kynhun kaba jop na ka Knockout 1 ha ka 06tarik Ïaiong. Katba ka Mohun Bagan (home) kan ïakhun ïa ka kynhun kaba jop na ka knockout 2 ha ka 07tarik Ïaiong.
Ïa ka final kaban long ha ka 12tarik ka jingïakhun kan long hapdeng ka kynhun kaba jop ïa ka semi final 1 pyrshah ïa ka kynhun ba jop ïa ka semi final 2.
Kumban shu phai dien, ka jingïoh jong ka NorthEast United FC ban rung sha ka playoff ka dei hadien ba ka la wan ha ka kyrdan kaba saw da ki 38 points da ka jingjop haduh 10 tylli ki jingïakhun bad ïakhaid pat haduh phra sien.
Tangba ha kawei pat ka liang, u khlur thep kol ka kynhun u Alaaeddine Ajaraie ula kylla long u rangthep kol ba ïoh thep bun tylli eh haduh 23 tylli na ki 24 sien mih madan.
Kane kadei ruh ka sien kaba nyngkong ïa ka NorthEast ban rung biang sha ka playoff naduh u snem 2020-21 nalor ba ka ïoh ruh ban pynlong ha Shillong ha ka sien kaba nyngkong. Ka jingpynkut jong ka kynhun ïa ka League ha kane ka lympung ka la pynhun ïa ki paid ieid phutbol ka thain hadien ba ki la lah ban jop haduh 4-0 kol ïa ka East Bengal.
Ka jingpyntikna ba ki la rung sha ka playoff ruh kadei hadien ba ki la jop ïa ka Chennaiyin FC haduh 3-0 kol ha ka 03tarik mynta u bnai.
Mynta kane ka kynhun hapoh ka jingïalam jong u Juan Pedro Bengali ka don ha ka jingpynkhreh naka bynta ban pynkhihwin biang ïa ki paid ieid phutbol kumba ka la ïoh ïa ka jingkyrshan bad ka jingshaniah ha ka lympung Durand Cup ha u snem ba la dep.
